2026-yil 9-iyun kuni poytaxtdagi “Hilton Tashkent City” mehmonxonasida MKBANK tomonidan “Career Event 2026” tadbiri tashkil etildi. Ochiq eshiklar kuni formatida o‘tkazilgan mazkur tadbir yoshlarni qo‘llab-quvvatlash, ularning kasbiy rivojlanishiga ko‘maklashish hamda bank va oliy ta’lim muassasalari o‘rtasidagi hamkorlikni mustahkamlashga qaratildi.
Tadbirda respublikamizning yetakchi oliy ta’lim muassasalari vakillari, talabalar, bitiruvchilar hamda bank sohasi mutaxassislari ishtirok etdi. Uchrashuv davomida ta’lim va amaliyot integratsiyasini rivojlantirish, yosh mutaxassislarni mehnat bozoriga tayyorlash hamda ularning bandligini ta’minlash masalalari muhokama qilindi.
“Career Event 2026” doirasida MKBANK va bir qator nufuzli oliy ta’lim muassasalari o‘rtasida hamkorlik memorandumlari imzolandi. Jumladan, MDIS in Tashkent, Qo‘qon davlat universiteti, G.V. Plexanov nomidagi Rossiya iqtisodiyot universitetining Toshkent filiali, Yangi O‘zbekiston universiteti, Webster universiteti hamda Jahon iqtisodiyoti va diplomatiya universiteti bilan hamkorlik istiqbollari yuzasidan kelishuvlarga erishildi.
Mazkur memorandumlar talabalar uchun amaliyot dasturlarini kengaytirish, ta’lim jarayonini amaliy tajriba bilan boyitish, istiqbolli yoshlarni bank tizimiga jalb etish hamda bitiruvchilarning ish bilan ta’minlanish imkoniyatlarini oshirishga xizmat qiladi.
Tadbir davomida talabalar va bitiruvchilar MKBANKning faoliyati, bank tizimidagi zamonaviy kasblar hamda mavjud vakansiyalar haqida batafsil ma’lumot oldilar. Shuningdek, ular bankning tajribali mutaxassislari va rahbarlari bilan bevosita muloqot qilish, o‘zlarini qiziqtirgan savollarga javob olish hamda karyera rivoji bo‘yicha tavsiyalar olish imkoniyatiga ega bo‘ldilar.
Tadbirning muhim jihatlaridan biri yoshlarning kasbiy salohiyatini rivojlantirish, ularni zamonaviy mehnat bozori talablariga mos mutaxassis sifatida shakllantirishga qaratilgan tashabbuslarning muhokama qilinganidir. Bu esa ta’lim muassasalari va ish beruvchilar o‘rtasidagi hamkorlikni yanada mustahkamlashga xizmat qiladi.
MKBANK yoshlarni qo‘llab-quvvatlash, ularning bilim va ko‘nikmalarini rivojlantirish hamda malakali kadrlar zaxirasini shakllantirish bo‘yicha amalga oshirilayotgan ishlarni izchil davom ettiradi. Bank kelgusida ham ta’lim muassasalari bilan samarali hamkorlikni kengaytirib, yoshlar uchun yangi imkoniyatlar yaratishga alohida e’tibor qaratadi.
Bank Axborot xizmati
Yana ko‘ring
Dam olish kunlari ham ishlaymiz!
Korrupsiya haqida xabar ber, adolat uchun kurash!
Jim turish – bu illatga ijozat berishdir.
