"Mikrokreditbank" ATB Navoiy viloyat hududiy boshqarmasi Qiziltepa bank xizmatlari markazida huquqni muhofaza qiluvchi organlar vakillari ishtirokida bank tizimida korrupsiyaga qarshi kurashish, ochiqlik va shaffoflikni ta’minlash hamda manfaatlar to‘qnashuvining oldini olish masalalariga bag‘ishlangan davra suhbati bo‘lib o‘tdi.
Unda bank mutasaddilari, mas’ul shaxslar va Qiziltepa tumani IIB XPB inspektori, katta leytenant B.Raxmatovlar ishtirok etdi.
Mazkur tadbirdan ko‘zlangan asosiy maqsad, bank xodimlarining korrupsiyaga qarshi kurashish borasidagi huquqiy bilim va ko‘nikmalarini yanada mustahkamlash, amaldagi qonunchilik talablari hamda xizmat faoliyatida halollik tamoyillariga qat’iy rioya etish madaniyatini oshirishdan iborat bo‘ldi.
Davra suhbati davomida huquqni muhofaza qiluvchi organlar mutaxassislari tomonidan korrupsiyaga oid huquqbuzarliklarning oldini olish, manfaatlar to‘qnashuvini o‘z vaqtida aniqlash va bartaraf etish, xizmat vakolatlarini suiiste’mol qilishning salbiy oqibatlari hamda bunday holatlar uchun belgilangan javobgarlik choralari yuzasidan batafsil ma’lumotlar berildi.
Shuningdek, bank tizimida korrupsiyaga qarshi kurashish bo‘yicha amalga oshirilayotgan islohotlar, ichki nazorat mexanizmlarini takomillashtirish, xodimlarning odob-axloq qoidalariga rioya etishi hamda har bir xodimning ushbu yo‘nalishdagi shaxsiy mas’uliyati alohida ta’kidlandi.
Tadbir yakunida ishtirokchilar o‘zlarini qiziqtirgan savollarga mutaxassislardan batafsil javob oldilar hamda korrupsiyaga nisbatan murosasiz munosabatni shakllantirish, manfaatlar to‘qnashuvining oldini olish va halollik tamoyillariga sodiq qolish bank faoliyatining ustuvor yo‘nalishlaridan biri ekani yana bir bor e’tirof etildi.
"Mikrokreditbank" ATB tizimida korrupsiyaga qarshi kurashish, ochiqlik va shaffoflikni ta’minlash hamda halol mehnat tamoyillarini mustahkamlash bo‘yicha izchil ishlar kelgusida ham davom ettiriladi.
Bank Axborot xizmati
Yana ko‘ring
Dam olish kunlari ham ishlaymiz!
Korrupsiya haqida xabar ber, adolat uchun kurash!
Jim turish – bu illatga ijozat berishdir.
