Bugungi kunda quyonchilik iqtisodiyotimiz rivojiga oʼzining salmoqli hissasini qoʼsha oladigan istiqbolli sohalardan biri deya eʼtirof etilmoqda. Maʼlumki, Mikrokreditbank mazkur soha taraqqiyotiga hissa qoʼshish maqsadida tizim tarkibiga biriktirilgan va hozirga qadar quyonchilik sohasida bir qator ishlar qilinib, joriy yil yakuniga qadar amalga oshirilishi lozim boʼlgan aniq chora-tadbirlar belgilangan.

Shu jumladan, 2017-2020-yillar davomida respublika boʼyicha tashkil qilingan quyonchilik xoʼjaliklariga xorijdan jami 4 570 bosh naslli quyonlar keltirilgan.

Taʼkidlash lozimki, oʼtgan davrda bank tomonidan quyonchilik sohasini moliyalashtirish uchun jami 76,9 mlrd soʼm miqdorida kreditlar ajratilgan. Natijada, bugungi kunga kelib, ushbu loyihalarni amalga oshirish hisobiga quyonlar soni soʼnggi uch yilda qariyb sakkiz marta oʼsib, 2019-yil davomida 583 ming bosh quyon yetishtirildi. Shu bilan birga, quyonchilik sohasida faoliyat olib boruvchi 2 147 nafar fuqaro ish oʼrinlari bilan taʼminlandi.

Bundan tashqari, 2020-yil birinchi choragida 5 ta yirik quyonchilik xoʼjaliklariga 5,5 mlrd soʼm kreditlar ajratilib, 17 ming bosh nasl beruvchi ona quyon boqish quvvatlari yaratildi.

Oʼzbekiston Respublikasi Prezidentining 2019-yil 31-oktyabrdagi 47-sonli majlis bayoniga koʼra, mamlakatda yetishtiriladigan yillik quyonlar sonini 2020-yilda uch mln boshga yetkazish vazifasi topshirilgan.

Ushbu vazifa ijrosini taʼminlash maqsadida, bank tomonidan umumiy yillik quvvati uch mln bosh quyon yetishtirishga 151 ta loyiha manzilli roʼyxati shakllantirilib, ularni moliyalashtirish uchun zarur boʼlgan 177 mlrd soʼm mablagʼlar manbaasi belgilangan.

Jumladan, soha rivojini ilmiy yondashuv asosida va zamonaviy shaklda tashkil etish hisobiga yillik quvvati 1 350 ming bosh quyon yetishtirish imkonini beruvchi 5 ta yirik quyonchilik klasterlari tashkil etiladi.

Mazkur klasterlarga bank tomonidan 145,4 mlrd soʼm kreditlar ajratilib, shundan toʼrtta quyonchilik klasteri joriy yilning 1-oktyabriga qadar va bittasi 1-dekabrga qadar ishga tushiriladi.

Аmalga oshirilgan chora-tadbirlar natijasida yil yakuniga qadar aholi va quyonchilik xoʼjaliklarida qoʼshimcha ravishda 2,5 mln bosh quyon yetishtirish infrastrukturasi yaratilib, sohada 5 943 nafar aholi bandligi taʼminlanadi.

Natijada yil yakuniga qadar bank tomonidan moliyalashtiriladigan jami loyihalar hisobiga sakkiz mingdan ortiq aholi ish bilan taʼminlanadi.

Mazkur loyihalar hamda chora-tadbirlar izchil davom ettirib borilishi soha rivojining asosiy mezoni boʼlib xizmat qiladi. Zero, sarmoya kiritilgan va istiqbolli loyihalar asosida ish olib boradigan tizimning kelajagi yuksak marralarni zabt etishdir.