Oʻzbekiston Respublikasi Prezidentining 2021-yildagi “Fargʻona viloyatining Uchkoʻprik tumanida yengil sanoat mahsulotlarini ishlab chiqarishni, logistika va savdo tarmoqlarini rivojlantirish chora-tadbirlari toʻgʻrisida”gi 5127-sonli qaroriga asosan, Uchkoʻprik tumanida 15 gektar yer maydonida 358 ta ishlab chiqarish sexi, 218 ta savdo doʻkoni, 230 ta kichik savdo rastasi va boshqa xizmatlarni oʻz ichiga olgan savdo kompleksini tashkil qilish belgilangan boʻlib, mazkur savdo kompleksi toʻliq ishga tushirilishi natijasida 1 300 nafardan ziyod yangi tadbirkorlik subyektlari faoliyati yoʻlga qoʻyilishi rejalashtirilgan.
Bank infratuzilmasini kengaytirish, Uchkoʻprik tumanida aholi va tadbirkorlik subyektlarining bank xizmatlariga boʻlgan ehtiyojini qondirish hamda bankka yangi mijozlarni jalb etish maqsadida ushbu savdo kompleksi hududida yangi bank boʻlinmasini tashkil etishni taqozo etmoqda.
Shundan kelib chiqib, Bank boshqaruvining tegishli qaroriga asosan Uchkoʻprik tumani “Boboshbek” MFY, Navoiy koʻchasi 202-uy manzilda “Boboshbek” bank xizmatlari markazini tashkil etish belgilandi.
Xususan, mijozlar bu yerda hisob raqam va plastik kartalar ochishi, valyuta almashtirishi, kredit va omonat rasmiylashtirishi, barcha turdagi toʻlovlarni amalga oshirishi hamda xalqaro pul oʻtkazmalarini qabul qilishi va yuborishi mumkin.
Bank xizmatlari markazi 24/7 tarzda faoliyat koʻrsatuvchi zamonaviy bankomat va infokiosklar bilan taʼminlanadi.
Bank Axborot xizmati
