Asossiz va qayta yo‘llangan murojaat rad etildi

“Shunqorboy-11” OK rahbari Qodiroxunov Shunqorbek Abdishukur oʻgʻli joriy yilning 13-dekabr kuni Achchiq TV Youtube kanali orqali navbatdagi asossiz murojaatini yo‘llagan. Unda fuqaro “Mikrokreditbank” ATB Andijon Bank xizmatlari ofisidan muzlatgich ombori qurish va transformator sotib olish maqsadida 84 oy muddatga, yillik 14 foiz bilan 1 mlrd. soʻm kredit olishdagi muammolarni tilga olgan.

Ta’kidlash kerakki, fuqaroning bu kabi murojaatlari birinchi marta emas va har gal ayb o‘zida bo‘lsa-da, bankni aybdor qilib, qarzdorlikni to‘lashda turli sabablarni vaj qilgan.  

Mazkur murojaat bankning Andijon viloyati bank xizmatlari ofisi Kredit komissiyasi tomonidan oʻrganib chiqilgan va quyidagi sabablarga koʻra rad etilgan.

1) “Shunqorboy-11” OK va unga aloqador shaxslar (otasi - Qadir-Axunov Shukurjon Abdurasulovich rahbarligidagi “Shukrona-Shunkor-Shoxid” XK, onasi - Qadir-Axunova Nasibaxon Aʼzamjonovna) salbiy kredit tarixiga ega, yaʼni bank oldidagi majburiyatlarini bajarmagan: 

- 2017-yil 14-fevralda imzolangan kredit shartnomasiga koʻra Qadir-Axunov Shukurjon Abdurasulovich rahbarligidagi “Shukrona-Shunkor-Shoxid”XK ga 150 mln.soʻm kredit ajratilgan boʻlib, ushbu kredit oʻz vaqtida toʻlanmaganligi sababli sudga murojaat qilingan va undiruv boʻyicha ijro harakatlari boshlangan.

Biroq fuqaro Qadir-Axunov Shukurjon Abdurasulovich tomonidan ijro harakatlariga doimiy ravishda toʻsqinlik qilib kelingan.

Tadbirkor bank oldidagi oʻz majburiyatlarini bajarishni xohlamasdan, doimiy ravishda viloyat hokimligiga qarzdorlikni qoplab berish toʻgʻrisida murojaat qilgan. Ushbu murojaatlardan soʻng viloyat hokimligi tashabbusi va yordami bilan tadbirkorning jami 220 mln. soʻm (150 mln. soʻm asosiy qarz, 70 mln. soʻm foiz qarzdorligi) qarzdorligi homiylar va bank hisobidan 2021-yil 14-iyunda toʻliq qoplangan. 

- Qodiroxunov Shunqorbek Abdishukur oʻgʻlining onasi Qadir-Axunova Nasibaxon Aʼzamjonovna nomiga bankdan tikuvchilik faoliyati uchun 2021-yil 19-oktabdagi kredit shartnomasiga asosan, ajratilgan 30 mln. soʻm imtiyozli kredit boʻyicha umuman toʻlov amalga oshirilmagan. 

Fuqaro bank tomonidan bir necha bor ogʻzaki va yozma ogohlantirishlarga qaramasdan, bugungi kunda 37,3 mln.soʻm (30 mln.soʻm asosiy, 7,3 mln.soʻm foiz) muddati oʻtgan kredit qarzdorligini toʻlamasdan kelmoqda. 

Bank tomonidan ushbu qarzdorlikni undirish maqsadida Sud organlariga daʼvo arizalari kiritilib, 2023-yil 17-fevralda Sud hukmiga asosan, qarzdorlikni undirish Majburiy ijro buyurosi tomonidan amalga oshirilmoqda. Biroq shu paytgacha buning natijasi boʻlmadi, yaʼni qarzdorlik soʻndirilmadi.   

2) Qodiroxunov Shunqorbek Abdishukur oʻgʻliga aloqador shaxslarning boshqa majburiyatlari boʻyicha:

Qodiroxunov Shunqorbek Abdishukur oʻgʻlining opasi – Qodiroxunova Shukrona Shukurjon qizi rahbarligidagi “Shayxullo Shamsinur Shodiyona” MCHJ Oʻzbekiston Respublikasi Investitsiyalar va tashqi savdo vazirligi tomonidan ajratilgan 1 mlrd. soʻm qarz evaziga garovga olingan Andijon shahar, Bogʻishamol avtomobil bozori hududida joylashgan binoda muzlatgich ombori qurishni rejalashtirgan, ammo Oʻzbekiston Respublikasi “Garov toʻgʻrisida”gi qonunining 22-moddasida “garovga qoʻyilgan huquq bekor boʻlishiga yoki uning qiymati kamayishiga sabab boʻluvchi xatti-harakatlar qilmasligi” belgilangan.  

Mazkur qarz shartnomasi boʻyicha garov obyektiga oʻzgartirish va qoʻshimchalar kiritish garovga oluvchining roziligi bilan amalga oshirilishi lozim. Shuningdek, qarz shartnomasiga asosan “Shayxullo Shamsinur Shodiyona” MCHJning muddati oʻtgan toʻlovlari yuzaga kelgan.

Shuni alohida taʼkidlash kerakki, fuqaro Qadir-Axunov Shukurjon Abdurasulovich “Shunqorboy-11” OK, “Shayxullo Shamsinur Shodiyona” MCHJ larning norasmiy rahbari hisoblanadi.

Bundan tashqari, korxona rahbari tomonidan soʻralayotgan 1 mlrd.soʻmlik kredit taʼminotiga Investitsiyalar va tashqi savdo vazirligi tomonidan ajratilgan qarz evaziga garovga olingan binoni Mikrokreditbankka taqdim etish rejalashtirilgan.

Yuqoridagilardan koʻrinib turibdiki, “Shunqorboy-11” OK rahbari Qodiroxunov Shunqorbek Abdishukur oʻgʻli va korxonaning norasmiy rahbari Qadir-Axunov Shukurjon Abdurasulovichlar bankdan qoʻshimcha mablagʻlarni oʻzlashtirish maqsadida turli xil manbalarda asossiz ravishda bankni ayblab, notoʻgʻri maʼumotlarni tarqatib kelishmoqda.  

Bank Axborot xizmati