Parkent tumani — Oʻzbekistonda turizm salohiyati tobora yuksalib borayotgan hududlardan biri. Ushbu manzil oʻzining betakror tabiati, sof havosi va musaffo manzaralari bilan mahalliy hamda xorijiy sayyohlar uchun jozibador manzilga aylanib bormoqda.
Mikrokreditbank Boshqaruv raisi oʻrinbosari Shaxlo Ibragimova Parkentdagi Kumushkon qishlogʻida boʻlib, bank tomonidan amalga oshirilayotgan turizm loyihalari, xotin-qizlar tadbirkorligini qoʻllab-quvvatlash borasidagi ishlar bilan tanishdi.
Dastlabki manzil “Mikrokreditbank” ATBning moliyaviy koʻmagida tashkil etilgan “Sayyoh 2000” loyihasi boʻldi. Tadbirkor Olim Yusupov soy boʻyidagi hovlisida 48 oʻrinli mehmon uyi ochgan. Xonalar milliy uslubda, shinam qilib jihozlangan. Mehmon uyi yiliga 2 mingdan ziyod sayyohga xizmat koʻrsatadi. Yaqinda Prezidentimiz ham ushbu maskanda boʻlib, mehmon uyi faoliyati bilan tanishgan edi. Bu yerdagi obodlikni koʻrib, bu tashabbusni boshqa hududlarda ham joriy etishni aytgan edi.
Olim Yusupov mehmonxonani tashkil etish uchun dastlab 300 million soʻm miqdorida imtiyozli kredit olgan. Bugungi kunga kelib, u 20 nafar fuqaroni doimiy ish bilan taʼminlagan. Ayni damda oʻz faoliyatini yanada kengaytirish maqsadida 1 gektar yer maydonida 100 oʻrinli zamonaviy turizm markazi qurilishini boshladi. Loyihaning ikkinchi bosqichi uchun Mikrokreditbank tomonidan 3 milliard 800 million soʻmlik kredit ajratildi. Yangi majmua ishga tushgach, yana 30 nafar yangi ish oʻrni yaratiladi.
“Mikrokreditbank” ATB nafaqat mazkur mehmon uyi loyihasiga, balki Parkent tumanidagi boshqa qator tashabbuslarga ham moliyaviy koʻmak koʻrsatmoqda. Xususan, Kumushkon qishlogʻidagi 7 ta mehmon uyi va 5 ta xizmat koʻrsatish obyekti bank kreditlari orqali tashkil etildi. Buning uchun 1 milliard soʻmga yaqin “Oilaviy tadbirkorlikni rivojlantirish” hamda “Mahalla” dasturlari asosida kreditlar ajratilgan. Ayniqsa, xotin-qizlar tadbirkorligini qoʻllab-quvvatlashga qaratilayotgan eʼtibor bugun opa-singillarimizning moddiy farovonligini oshirishga, turmush sharoitlarini yanada yaxshilashga xizmat qilmoqda.
Ushbu mahallada istiqomat qiluvchi Inobat Gʻiyosova turizm va xizmat koʻrsatish sohasida koʻp yillik tajribaga ega. U oʻz mehmon uyini jihozlash uchun 190 million soʻm kredit olib, hozirda faoliyatini kengaytirish niyatida. Shaxlo Ibragimova mazkur obyektga ham tashrif buyurib, tadbirkor ayol faoliyati bilan tanishdi. Muloqot chogʻida Inobat opaga bankning yangi kredit paketlari va imtiyozlari, jumladan, “Hamroh” dasturi haqida maʼlumot berib, tegishli tavsiyalar bilan oʻrtoqlashdi.
Inobat Gʻiyosova — “Shuhrat” medali sohibi. U qishlogʻida turizmni rivojlantirish orqali nafaqat oʻz oilasi, balki butun mahallasiga naf keltirayotganidan faxrlanadi.
Davlat rahbarining doimiy qoʻllab-quvvatlashi, Mikrokreditbankning moliyaviy koʻmagi hamda mahalliy tadbirkorlarning tashabbusi orqali Parkent tumanida, xususan Kumushkon qishlogʻida turizm, xizmat koʻrsatish va oilaviy tadbirkorlik salohiyati kengaymoqda. Bu esa hudud iqtisodiy oʻsishi, ijtimoiy barqarorlik va aholi farovonligi uchun mustahkam poydevor yaratib bermoqda.
Bank Axborot xizmati
Boshqa yangiliklar
MOLIYAVIY XAVFSIZLIKNI TA’MINLASH YO‘LIDA
