Soʻnggi yillarda mamlakatimizda toʻqimachilik va tikuv-trikotaj sanoatini rivojlantirish, soha korxonalarining investitsiya va eksport faoliyatini qoʻllab-quvvatlash boʻyicha kompleks chora-tadbirlar amalga oshirilishi natijasida respublikada ishlab chiqarilayotgan mahsulotlar sifati, hajmi va turlari ortib, mamlakatimizning eksport salohiyati oʻsib borayotganini koʻrish mumkin. 

Oʻzbekiston Respublikasi Prezidentining 2023-yil 10-yanvardagi “Paxta-toʻqimachilik klasterlari faoliyatini qoʻllab-quvvatlash, toʻqimachilik va tikuv-trikotaj sanoatini tubdan isloh qilish hamda sohaning eksport salohiyatini yanada oshirish chora-tadbirlari toʻgʻrisida”gi Farmoni, Oʻzbekiston Respublikasi Prezidentining 2020-yil 21-oktabrdagi “Eksport faoliyatini moliyaviy qoʻllab-quvvatlashni yanada kengaytirish chora-tadbirlari toʻgʻrisida”gi Farmoni hamda Oʻzbekiston Respublikasi Prezidentining 2024-yil 14-martdagi “Tashqi savdo va hududiy sanoatni rivojlantirishda tadbirkorlar birlashmalarining rolini yanada oshirish chora-tadbirlari toʻgʻrisida”gi Qaroriga asosan, Eksportni ragʻbatlantirish agentligi hamda Eksportni qoʻllab-quvvatlash jamgʻarmasi negizida Davlat aktivlarini boshqarish agentligi muassisligida “Savdoni rivojlantirish kompaniyasi” AJning eksportoldi moliyalashtirish mablagʻlari hisobidan “Mikrokreditbank” ATB tomonidan ajratilgan imtiyozli kredit orqali eksport rejasini ortigʻi bilan bajarayotgan korxonalar talaygina.

Ulardan biri Buxoro viloyati Romitan tumanidagi “Romstar” Oʻzbekiston–Amerika qoʻshma korxonasidir. Pillani qayta ishlash korxonasi 2004-yilda ish boshlagan boʻlib, bu yerda viloyatdagi Qorakoʻl, Olot, Jondor, Romitan tumanlaridan 18 ming kasanachilar yetishtirgan pilla qabul qilinib, ipak kalavaga aylantiriladi. 

Respublikamizda pillachilik sohasini rivojlantirish, ishlab chiqariladigan mahsulot turlarini kengaytirish, pillachilik korxonalarining eksport salohiyatini va investititsiya faoliyatini har tomonlama qoʻllab-quvvatlash boʻyicha olib borilayotgan kompleks chora-tadbirlar natijasida ushbu korxonaning ham eksport salohiyati yildan yilga ortib bormoqda. 220 nafar ishchi-mutaxassisga ega “Romstar” qoʻshma korxonasida sanoat uchun qimmatbaho pilla xom ashyosini qayta ishash, pilla chuvish, qayta oʻrash, xom ipak tola va ipak momigʻini ishlab chiqarish faoliyati yoʻlga qoʻyilgan boʻlib, ushbu mahsulotlar asosan Xitoy, Vetnam va Eron davlatlariga eksport qilinmoqda. 

Korxonaning ishlab chiqarish quvvatiga toʻxtaladigan boʻlsak, Xitoy texnologiyasi asosida yil boʻyi 150 tonna xom ipak tola ishlab chiqarish imkoniyatiga ega. Mavjud shart-sharoitdan kelib chiqqan holda korxonada 2023-yilda 120,3 tonna ipak tola ishlab chiqarilgan boʻlib, buyurtmachilarga yetkazilgan ipak tola evaziga 4 milliard soʻmdan ortiq sof foyda olingan. Oʻzbek ipak mahsulotlari eksportini amalga oshirish bilan shugʻullanib kelayotgan qoʻshma korxonaning yillik hisob raqam aylanmasi 30 milliardni tashkil etadi. 

Korxona rahbari Qoʻshshi Kattayevning taʼkidlashicha, u korxona faoliyatini kengaytirishda “Mikrokreditbank”ning moliyaviy koʻmagiga tayanadi. “Romstar” korxonasi hozirga qadar 18 marotaba aynan mazkur bank kredit liniyalaridan foydalangan. Korxonaning mahsulotlar eksportini qoʻllab-quvvatlash maqsadida bank tomonidan 1 000 000 AQSH dollari mikdorida 20 oy muddatga, 6 oylik imtiyozli davr bilan, 6 foizli kredit mabagʻlari ajratilgan. 

“Xom ashyo va ishlab chiqarish salmogʻi oshayotgani tufayli mazkur korxona tizimidagi 6 ta pilla qabul qilish maskani modernizatsiyalash dasturiga binoan qayta rekonstruksiya qilingani hisobidan Romitan, Jondor, Qorakoʻl va Olot tumanlaridagi maskanlarda jami 117 ta qoʻshimcha ish oʻrni yaratilgan. Mazkur qayta taʼmirlash ishlari uchun 8,5 milliard soʻm mablagʻ sarflangan boʻlib, pilla yetishtirish va qabul maskanlarida saranjomlash mavsumida 4 mingga yaqin yollanma ishchi jalb qilmoqdamiz”, - deydi korxona rahbari.

Korxona oʻz oldiga aniq maqsadlar qoʻygan. Yiliga 80 tonna ipak tolasi, 30 tonna ipak momigʻi ishlab chiqarilayotgan ushbu korxonada endilikda ipak matolari xususan, atlas toʻqish ham yoʻlga qoʻyilishi rejalashtirilgan. Xorijiy davlatlarda oʻtkaziladigan “MILANO UNICA” kabi turli xalqaro koʻrgazmalarda ham faol ishtirok etib kelayotgan korxona Yaponiya, Italiya, Germaniya, Shveysariya, Ruminiya va Ispaniyaning yirik kompaniyalari vakillari bilan oʻzbek ipak mahsulotlari eksportini amalga oshirish hamda ipakdan tayyor mahsulotlarni ishlab chiqarish uchun Oʻzbekistonda oʻzaro hamkorlikda yangi investitsiya loyihalarini yoʻlga qoʻyish yuzasidan muzokaralar olib bormoqda. 

Maʼlumot oʻrnida aytish lozimki, joriy yil boshidan beri “Mikrokreditbank” ATB tomonidan tadbirkorlik subyektlarining investitsion loyihalarini moliyalashtirish uchun respublika boʻyicha “Romstar” singari yana 95 ta loyihaga jami 384,4 mlrd. soʻm ekvivalentida mablagʻlar ajratilgan. “Mikrokreditbank”  oʻzining xorijiy kredit liniyalari orqali jalb qilingan mablagʻlari bilan iqtisodiyotning real sektori korxonalarini modernizatsiya qilish va investitsiya loyihalarini moliyaviy qoʻllab-quvvatlashda davom etadi.

Bank Axborot xizmati