Prezidentimizning 2024-yil 4-oktabrdagi “Kambagʻallikni qisqartirish va bandlik sohasida davlat siyosatini takomillashtirishda samaradorlikni oshirish chora-tadbirlari toʻgʻrisida”gi qarori ijrosini taʼminlash maqsadida “Mikrokreditbank” ATB tomonidan Germaniyaning “International People” xalqaro tashkiloti bilan hamkorlikda muhim loyiha amalga oshirildi.
Unga koʻra, Buxoro shahrida Germaniyada ishlash istagida boʻlgan fuqarolarni kasb va tilga oʻqitish markazi tashkil etildi.
Markazning ochilish marosimida Germaniya kompaniyasi rahbarlari hamda “Mikrokreditbank” ATB Boshqaruv raisi oʻrinbosari Shahlo Ibragimova ishtirok etdi.
Markazda ishsiz va kambagʻal oilalar farzandlari xalqaro standartlar asosida tayyorlanib, xorijda tan olinadigan sertifikatlar orqali ishga yoʻllanadi.
Mikrokreditbank tomonidan ushbu yoʻnalishda qator imkoniyatlar taqdim etilmoqda:
• oʻqish, viza, aviachipta va yashash xarajatlari uchun imtiyozli kreditlar;
• xalqaro bank kartalari (Visa, Mastercard, UnionPay);
• pul oʻtkazmalari uchun qulay moliyaviy xizmatlar;
• zamonaviy oʻquv uskunalarini xarid qilish uchun kreditlar;
• oʻquv seminarlari va maslahat xizmatlari.
Loyiha doirasida 544 ta mahallaning mahalla bankiri va yordamchi agentlari orqali fuqarolar saralanib, oʻqishga jalb etiladi. Taʼlimni muvaffaqiyatli yakunlaganlarga oylik maoshi 2500 dollardan boshlanuvchi ish oʻrinlari taklif etiladi.
Shu kuni “Mikrokreditbank” ATB hamda Migratsiya agentligi Buxoro hududiy filiali bilan hamkorlikda Germaniyaning yirik rekruit kompaniyasi hisoblangan “International People GmBH and Co GK” bilan uch tomonlama hamkorlik memorandumi ham imzolandi.
Mikrokreditbank tomonidan amalga oshirilayotgan ushbu loyiha nafaqat ishsizlikni kamaytirish, balki aholini xalqaro mehnat bozoriga tayyorlash orqali mamlakat iqtisodiyotiga ham hissa qoʻshadi.
Bank Axborot xizmati
Yana ko‘ring
Xalqaro imkoniyatlar: Xinjiang Bank’da yana bir korrespondentlik hisobi
Eskrou xizmatlarini dam olish kunlari ham amalga oshira olasiz
