Oʻzbekistonda xotin-qizlar tadbirkorligi yangi bosqichga koʻtarildi. Ayollarning ishbilarmonlik faoliyatini rivojlantirish uchun yaratilayotgan sharoitlar nafaqat iqtisodiy oʻsishga, balki ularning jamiyatdagi faolligini oshirishga xizmat qilmoqda. Bu jarayonda davlat rahbarining qoʻllab-quvvatlashi hamda banklar tomonidan koʻrsatilayotgan moliyaviy yordamning ahamiyati katta.
Toshkent shahri, Chilonzor tumanidagi “Guliston” mahallasida joylashgan “YarntextileFotima” hunarmandchilik markazi — xotin-qizlar tadbirkorligini qoʻllab-quvvatlash borasidagi muhim tashabbuslardan biri desak, mubolagʻa boʻlmaydi. Tadbirkor Fotima Qurbonova rahbarlik qilayotgan ushbu markazda toʻquvchilik, kashtachilik, milliy uslubdagi taqinchoqlar va esdalik buyumlarini tayyorlash boʻyicha amaliy oʻquv kurslari tashkil etilgan. Fotima Qurbonova bu loyiha orqali mahalliy aholiga kasb oʻrgatishni, ayniqsa, ishsiz va nogironligi bor ayollar uchun yangi imkoniyatlar eshigini ochishni maqsad qilgan.
Fotima Qurbonova tashabbusi bilan ish boshlagan markaz “Mikrokreditbank” ATB tomonidan 100 million soʻmlik imtiyozli kredit bilan qoʻllab-quvvatlandi. Natijada 115 nafar xotin-qizlar doimiy ish bilan band boʻldi, 3000 nafar kasb oʻrganuvchilar onlayn va oflayn shaklda taʼlim olmoqda. Markazda oʻqishni muvaffaqiyatli yakunlagan yoshlarning 13 nafari oʻz biznesini yoʻlga qoʻydi, 55 nafari esa shu markazning oʻzida ish faoliyatini davom ettirmoqda.
Bundan tashqari, bank tomonidan hunarmandchilikka oʻqib, oʻz yoʻlini topgan fuqarolarga imtiyozli kreditlar ajratilib, ularning shaxsiy biznesini yoʻlga qoʻyishlari uchun imkoniyatlar yaratilmoqda.
Ushbu markazda tayyorlangan mahsulotlar nafaqat mahalliy bozorda, badki xalqaro bozorda ham talab ortib bormoqda. Misol uchun, ushbu hunarmandchilik buyumlari Birlashgan Arab Amirliklari, Janubiy Koreya, AQSH va Yevropa davlatlariga ham eksport qilinmoqda. 
- Biz hunarmandchilik mahsulotlarimizni xorijiy davlatlarga Internet orqali sotishni yoʻlga qoʻydik, - deydi tadbirkor biz bilan suhbatda. – Oʻquvchilarimizga shu yerda hunar sirlarini oʻrganib, oʻz bozorini topishiga koʻmak beryapmiz. Albatta, bunday natijalarga erishishimizda Mikrokreditbankning moliyaviy qoʻllab-quvvatlashining ham alohida oʻrni bor. Kreditlarni ham oʻz vaqtida toʻlab boryapmiz. Xullas, ham xotin-qizlarga yordam beryapmiz, ham daromad olyapmiz.
Albatta, keyingi yillarda yurtimizda xotin-qizlar tadbirkorligi rivojlanib bormoqda. Bu borada tijorat banklari tomonidan ajratilayotgan imtiyozli kreditlarning ham ahamiyati bisyor.
Misol uchun, 2025-yilning oʻtgan davrida Mikrokreditbank tomonidan jami 11 ming 268 nafar xotin-qizlarga 201 mlrd. soʻmga yaqin imtiyozli kreditlar ajratilgan boʻlib, buning natijasida 10 ming dan ortiq yangi ish oʻrni yaratishga erishildi.
Xotin-qizlar tadbirkorligini qoʻllab-quvvatlash nafaqat iqtisodiy oʻsishni taʼminlamoqda, balki ayollarning jamiyatdagi mavqeini mustahkamlashda ham muhim ahamiyat kasb etmoqda. Fotima Qurbonova kabi tashabbuskor ayollar yuzlab insonlarga yangi imkoniyat eshiklarini ochmoqda. Bu esa, oʻz navbatida, yurtimiz xotin-qizlari uchun ishbilarmonlik va muvaffaqiyat davri boshlanganini anglatadi.
Bank Axborot xizmati
Yana ko‘ring
MKBANKda bank tizimi islohotlari va yangi rivojlanish bosqichi mavzusida matbuot anjumani tashkil etildi
Bugun bank tomonidan ikkilamchi bozordan uy-joy sotib olish uchun 21,55 foizdan boshlab ipoteka kreditlari ajratilishi yoʻlga qoʻyildi.
“Kitob o‘qish soati”da “Dunyoning ishlari” asari mutolaa qilindi
Asar har bir ishtirokchini o‘z hayoti, yaqinlari va qilayotgan ezgu ishlari haqida yana bir bor mushohada qilishga undadi.
