Poytaxtimizdagi “International Tashkent Hotel” mehmonxonasida “Sharq ayoli” xalqaro ayollar jamoat fondi, Oʻzbekiston menejerlar uyushmasi va Oʻzbekiston Respublikasi savdo-sanoat palatasi bilan hamkorlikda “Raqamli Iqtisodiyot-ayollar tadbirkorligining global integratsiyasi uchun koʻprik” mavzusida Xalqaro Forum oʻtkazilmoqda.
Ikki kun davom etadigan mazkur Forumda “Mikrokreditbank” ATB Boshqaruv raisi o‘rinbosari Shaxlo Ibragimova va bankning tegishli departament rahbarlari ham ishtirok etdi.
Forumning maqsadi, ayollar tadbirkorligini rivojlantirishda raqamli yutuqni amalga oshirish uchun barcha manfaatdor tomonlarning, shu jumladan, davlat va mahalliy hokimiyat organlari, fuqarolik jamiyati institutlari, ishbilarmon doiralar, xalqaro tashkilotlar va moliya institutlarining saʼy-harakatlari va resurslarini birlashtirish shu bilan birga, Oʻzbekiston va Markaziy Osiyo mintaqasida ayollarning raqamli va moliyaviy savodxonligini, ijtimoiy mavqeyini hamda iqtisodiy barqarorligini oshirishdan iborat.
Xalqaro forum davomida “Elektron tijorat-onlayn biznes dunyosida ayollar uchun imkoniyatlar”, “Raqamli bank-moliyaviy savodxonlikdan moliyaviy mustaqillikka erishish”, “Sunʼiy intellekt ayollar uchun yangi imkoniyatlar dunyosiga qoʻllanma” kabi mavzular muhokama qilinmoqda.
Ta’kidlash kerakki, forumda shuningdek, moliyaviy va raqamli savodxonlikni oʻqitishning yangi shakl va usullarini, shuningdek, biznes yuritish asoslarini tashkil etish orqali barcha hududlar, jumladan, Oʻzbekistonning eng chekka hududlari va Markaziy Osiyoning boshqa davlatlaridan kelgan ayollarni faol va samarali iqtisodiy hayotga jalb etish masalalari muhokama qilinadi.
Xalqaro Forum ertaga ham oʻz ishini davom ettiradi.
Bank Axborot xizmati
Yana ko‘ring
Bayram kunlaridagi ish tartibi!
