Mamlakatimizda korrupsiyaga qarshi kurashish, uning oldini olish, jamiyatimizda ushbu illatga nisbatan murosasiz muhitni shakllantirish borasida samarali ishlar olib borilmoqda.
Bugun “Mikrokreditbank” ATB bosh ofisida Korrupsiyaga qarshi kurashish agentligi bilan hamkorlikda “9-dekabr – xalqaro korrupsiyaga qarshi kurashish” kuniga bagʻishlangan “Ochiq eshiklar kuni” tadbiri oʻtkazildi.
Tadbirda Korrupsiyaga qarshi kurashish agentligi masʻul xodimi Nodira Samandarova, “Mikrokreditbank” ATB Boshqaruv raisi oʻrinbosari I.Djumaniyazov, bosh ofis va hududiy boshqarmalar xodimlari hamda OAV vakillari ishtirok etdi.
Tadbir davomida “Mikrokreditbank” ATB rahbariyati tomonidan xodimlarda korrupsiyaga, uning har qanday koʻrinishlariga nisbatan murosasiz munosabatni shakllantirish, korrupsiya holatlarini barvaqt aniqlash va oldini olish, ularning sabab va shart-sharoitlarini bartaraf etish, manfaatlar toʻqnashuviga yoʻl qoʻymaslik choralarini koʻrish ekanligi taʼkidlab oʻtildi.
Ushbu vazifalarni amalga oshirish bankda tashkil etilgan Korrupsiyaga qarshi kurashish departamentiga yuklatilgani qayd etildi.
Taʼkidlanishicha, “Mikrokreditbank” ATB xodimlarini korrupsiyaga qarshi kurashish yoʻnalishi boʻyicha oʻqitish va malakasini oshirish tegishli ishlab chiqilgan meʼyoriy hujjatlar hamda Oʻquv dasturlari asosida olib borilmoqda. Ayniqsa, bank xodimlarining huquqiy ongini oshirish, korrupsiyaga qarshi kurashish koʻnikmalarini xalqaro tajriba asosida shakllantirish maqsadida ISO 37001:2016 xalqaro standarti asosida 100 nafarga yaqin bank xodimlari maxsus oʻquv kursida malaka oshirib tegishli sertifikatlarga ega boʻlmoqda.
Shuningdek, bank tizimida korrupsiyaga oid huquqbuzarliklar haqida mijozlar tomonidan tezkor xabar berish imkonini beruvchi aloqa kanallari, ijtimoiy tarmoqlardagi rasmiy sahifalar yaratilgani, “Call-center” faoliyati ishga tushirilgani alohida qayd etildi.
Samimiy va savol-javoblarga boy oʻtgan tadbirda bank xodimlari oʻrtasida interaktiv tanlov ham tashkil etilib, unda bank xodimlari bilan birgalikda jurnalistlar ham faol ishtirok etishib esdalik sovgʻalari bilan, shuningdek, bank filiallari rahbarlari esa bank rahbariyati tomonidan tashakkurnomalar bilan taqdirlanishdi.
Bank Axborot xizmati
Yana ko‘ring
MKBANK va FOTON strategik hamkorlik va boʻlib toʻlash shartlari!
“Zolotaya Korona” yana faol!
