Muhtaram yurtdoshlar, aziz hamkorlar va hamkasblar! Bankimizning qadrli mijozlari!
Barchangizga bugungi qutlug‘ ayyom – O‘zbek tili bayrami muborak bo‘lsin!
Til – millatning madaniy va maʼnaviy boyligini aks ettiruvchi, oʻzbek xalqining madaniyati, urf-odati, tarixi va kelajagini koʻrsatuvchi vositadir. Bu yil Oʻzbek tiliga davlat timsoli sifatida davlat tili maqomi berilganiga 34 yil toʻldi.
Shu munosabat bilan, 21-oktabr – yurtimizda Oʻzbek tili bayrami kuni sifatida keng nishonlanadi.
Tilshunos olimlar inson hayoti uchun suv va havo qanchalik zarur boʻlsa, soʻz ham shunday ulugʻ maqomga egaligini doimo eʼtirof etishadi.
Til — millat koʻzgusi. Darhaqiqat, tili rivojlanmagan elning ruhida yuksalish boʻlmaydi, u oʻzligidan, milliyligidan tobora uzoqlashaveradi.
Bilamizki, 1989-yil 21-oktabrda “Davlat tili toʻgʻrisida”gi Qonun qabul qilingan boʻlsa, 2020-yil 10-aprelda “Oʻzbek tili bayrami kunini belgilash toʻgʻrisida”gi qonun qabul qilinib, 1-moddasi bilan 21-oktabr sanasi Oʻzbek tili bayrami kuni etib belgilandi va bu keng miqyosda bayram sifatida nishonlab kelinmoqda.
Oʻzbekiston Qahramoni, Oʻzbekiston xalq shoiri, ona tilimizning chinakam jonkuyari Erkin Vohidov “Soʻz latofati” asarida taʼkidlaydi: “Ona tili umummillat mulkidir, demak, til oldidagi masʼuliyat ham umummilliy. Men oʻzbekman, degan har bir inson oʻzbek tili uchun qaygʻurmogʻi kerak. Unutilgan soʻzlarni tiklash, borini boyitib borish, xorijiy atamalarga munosib istilohlar topish yolgʻiz tilshunoslarning emas, millatning ishidir”.
Ushbu fikrlar har birimizni ona tilimizni sevishga, uning rivojlanishi uchun oʻz sohamiz boʻyicha oz boʻlsa-da hissa qoʻshishga undaydi.
Muxtasar qilsak, yurtboshimiz aytganlaridek, har birimiz davlat tiliga boʻlgan eʼtiborni mustaqillikka boʻlgan eʼtibor deb, davlat tiliga ehtirom va sadoqatni ona Vatanga ehtirom va sadoqat deb bilishimiz lozim, bu harakatni barchamiz oʻzimizdan boshlashimiz, amaliy faoliyatda namoyon etishimiz kerak. Albatta, bu yoʻlda bor kuch-gʻayratimiz hamda bilimimizni sarflashimiz zarur.
Barchangizni bugungi bayram bilan yana bir bor samimiy tabriklayman.
Butayev Orif Aliboyevich
“Mikrokreditbank” ATB Boshqaruv raisi
Yana ko‘ring
Diqqat! MKBANK tizimida texnik ishlar olib borilmoqda!
MKBANK xodimi “MO‘TABAR AYOL” ko‘krak nishoni bilan taqdirlandi!
