Davlatimiz tomonidan qishloq xo‘jaligi, shu jumladan, parrandachilik tarmogʻini rivojlantirishga katta eʼtibor berib kelinmoqda.
Jumladan, parrandachilik tarmogʻiga qator subsidiya va imtiyozlar berilib, imtiyozlardan foydalanib iqtisod qilingan mablagʻlar parrandachilik korxonalarini rivojlantirishga hamda yangi parrandachilik korxonalari tashkil etilishiga zamin yaratmoqda.
Prezidentimizning 2025-yil 30-yanvardagi PQ-34-sonli qaroriga muvofiq, yirik parrandachilik xoʻjaliklari bilan aholi oʻrtasida kooperatsiya usulida “Parranda boqish – daromad topish” loyihasi amalga oshirilishi hisobiga Xorazm viloyatida 63 ming nafardan ortiq fuqarolarning bandligi taʼminlanishi rejalashtirilgan.
Shu maqsadda, joriy yilning 26-aprel kuni bank tomonidan moliyalashtirilgan Xorazm viloyatidagi “Qoʻshkoʻpir parranda” masʼuliyati cheklangan jamiyatiga bir guruh OAV vakillari ishtirokida press-tur tashkil etildi.
Xususan bugungi kunda viloyatda 114 ta parrandachilik xoʻjaliklari faoliyat yuritayotgan boʻlsa, ushbu xoʻjaliklarning aksariyati “Mikrokreditbank” ATB tomonidan taklif etilayotgan imtiyozli kredit hisobiga aholi xonadonlarida kooperatsiya asosida parranda boqishni tashkil etish va shu orqali aholi bandligini taʼminlashga oʻz hissasini qoʻshish istagini bildirmoqda.
Jumlandan, Qoʻshkoʻpir tumanidagi “Qoʻshkoʻpir parranda” masʼuliyati cheklangan jamiyati ham kooperatsiya asosida parranda boqishni boshlab yuborgan.
Mazkur korxona faoliyatini keng yoritish maqsadida, bir guruh OAV vakillari ishtirokida press-tur tashkil etilgan bo‘lib, unda jurnalistlar korxonada parrandachilik mahsulotlari ishlab chiqarish jarayoni bilan yaqindan tanishishdi.
Korxona Qoʻshkoʻpir tumanida joylashgan boʻlib, 8 ta parranda boqish binolari va soatiga 10 tonna ozuqa-yem ishlab chiqarish quvvatiga ega. Korxonada bugungi kunda 200 nafardan ziyod ishchi va xodimlar doimiy ish bilan taʼminlangan.
Korxonaga aholi xonadonlari bilan kooperatsiya timizimida ishlash uchun “Mikrokreditbank” ATB tomonidan 30 mlrd soʻm kredit mablagʻi ajratilib, buning natijasida viloyatning deyarli barcha tumanlarida 927 ta aholi xonadonlari bilan kooperatsiya asosida parranda boqish yoʻlga qoʻyilgan.
Maʼlumot uchun, joriy yilning birinchi choragida tijorat banklari tomonidan ajratilgan 73 mlrd soʻmdan ortiq kreditlar va koʻrsatilgan homiyliklar hisobiga viloyatda kooperatsiya asosida 5 ming nafar aholi bandligi taʼminlandi.
Press-tur davomida jurnalistlar mazkur loyihalar doirasida amalga oshirilayotgan ishlar xususida batafsil maʼlumotlarga ega boʻlishdi.
Bank Axborot xizmati
