Ijtimoiy tarmoqlarda Toshkent shahri, Yashnobod tumani, Ohangrabo ko‘chasi, 107-B manzilida joylashgan “Rohat Residence” turar joy majmuasi bilan bog‘liq holatlar hamda “Mikrokreditbank” ATB faoliyati yuzasidan tarqalayotgan xabarlar munosabati bilan quyidagilarni ma’lum qilamiz.
“Mikrokreditbank” ATB va “Broccoli plus” MCHJ o‘rtasida tuzilgan kredit shartnomasiga muvofiq, jamiyatga turar joy majmuasi qurilishini moliyalashtirish uchun kredit mablag‘lari ajratilgan. Mazkur kredit majburiyatlari ta’minoti sifatida jamiyatga tegishli ko‘chmas mulk belgilangan tartibda garovga qo‘yilgan.
Biroq, qarzdor tomonidan kredit mablag‘lari shartnomada belgilangan muddatlarda qaytarilmaganligi sababli, bank o‘z huquq va qonuniy manfaatlarini himoya qilish maqsadida sudga murojaat qilgan. Sudning hal qiluv qaroriga asosan kredit qarzdorligini undirish va undiruvni garovga qo‘yilgan mol-mulkka qaratish belgilangan.
Shu o‘rinda ta’kidlash lozimki, bank bilan quruvchi tashkilot o‘rtasidagi kredit munosabatlari hamda quruvchi tashkilot bilan fuqarolar o‘rtasida tuzilgan ulushdorlik shartnomalari alohida huquqiy munosabatlar hisoblanadi.
Bank fuqarolar bilan tuzilgan investitsiya (ulushdorlik) shartnomalarining tarafi emas. Shu bois, quruvchi tashkilotning fuqarolar oldidagi shartnomaviy majburiyatlari yuzasidan mas’uliyatni avtomatik ravishda bank zimmasiga yuklash huquqiy jihatdan to‘g‘ri emas.
Ko‘p kvartirali uylarni ulush kiritish asosida qurish jarayonida fuqarolar mablag‘larini jalb qilish bilan bog‘liq munosabatlar amaldagi qonunchilik talablari asosida tartibga solinadi. Bunda quruvchi tashkilotning o‘z zimmasiga olgan majburiyatlarini bajarishi va fuqarolarning huquqlari belgilangan tartibda himoya qilinishi muhim ahamiyatga ega.
“Mikrokreditbank” ATB har qanday masalaga qonunchilik talablari asosida, xolislik va qonuniylik tamoyillariga rioya etgan holda yondashadi. Bank faoliyatiga oid holatlarni baholashda barcha huquqiy asoslar va sud qarorlarini inobatga olish lozim, deb hisoblaymiz.
“Mikrokreditbank” ATB Axborot xizmati
Yana ko‘ring
Korrupsiya haqida xabar ber, adolat uchun kurash!
Jim turish – bu illatga ijozat berishdir.
