Ertaga, 7-avgust kuni Mikrokreditbank tomonidan Milliy matbuot markazida “Bank tizimi islohotlarini jadallashtirish hamda xizmatlar bozori hajmini oshirish” mavzusida navbatdagi matbuot anjumani oʻtkaziladi.
Unda bank Boshqaruv raisi o‘rinbosari Ikram Djumaniyazov, tegishli departament direktorlari hamda ommaviy axborot vositalari, jurnalist va blogerlar ishtirok etadi.
2025-yil yakunlariga koʻra, bank aktivlari 30,6 foizga oʻsib 30,7 trln.soʻmni, kredit portfeli 16,7 foizga koʻpayib 20,3 trln.soʻmni, kapital 60,6 foizga oshib 5,7 trln.soʻmni, depozitlar 24,4 foizga koʻpayib 9,7 trln.soʻmni tashkil etdi. Shuningdek, 263 mln. AQSH doll xorijiy kredit liniyalari jalb qilindi.
2026-yilning 1-yarim yilligida jami 6,8 trln. soʻm bank kreditlari ajratildi. Jumladan, kichik va o'rta biznes subyektlarini qoʻllab-quvvatlash uchun 5,3 trln. so‘m, shundan:
kichik biznes subyektlarini qoʻllab-quvvatlash doirasida 303 mlrd. soʻm;
oilaviy tadbirkorlik dasturi doirasida 1,1 trln. soʻm;
“biznesga birinchi qadam” doirasida 321,1 mlrd. soʻm;
“mening mahallam” dasturi doirasida 902,6 mlrd. soʻm;
investitsiya dasturi doirasida 2,8 trln. soʻm;
yirik loyihalarga (oboroti 100 mlrd. soʻmdan yuqori) 338,7 mlrd. soʻm ajratildi.
Natijada bank kreditlari hisobiga yarim yillikda 51 dan ortiq loyiha ishga tushirilib, 100 mingga yaqin yangi ish oʻrinlari yaratildi. Shundan, 14 ming nafari doimiy ishga joylashtirildi va 86 ming nafarga yaqini tadbirkorlikka jalb qilindi.
Mikrokreditbankka biriktirilgan mahallalarda mahalla bankiri va yordamchi agentlari tomonidan yanvar-iyun oyida 6,8 mingta plastik karta ochib berildi, 333 nafar aholidan 37,2 mlrd. soʻm omonat jalb etildi, 7 133 nafar aholiga 335,4 mlrd. soʻm kreditlar ajratilishiga koʻmaklashildi.
Shuningdek, bank transformatsiya jarayonlari tufayli dunyoning yirik va nufuzli banklari, jumladan, AQSHning BNY Mellon, Turkiyaning Aktif Bank, Germaniyaning ODDO BHF, Xitoyning Xinjiang va Bank of China banklarida vakillik hisobraqamlari ochilgan.
Bundan tashqari, xalqaro agentliklar bank barqarorligini yuqori baholashda davom etmoqda. Xususan Fitch Ratings agentligi bank reytingini muvaffaqiyatli BB- “Ijobiy” darajasidan BB “Ijobiy” darajasiga koʻtardi. Shu bilan birga, bank Moodyʻs agentligining Va3 “Ijobiy” reyting koʻrsatkichini ham barqaror saqlab kelmoqda.
Shuningdek, bank dasturchilari tomonidan tayyor biznes-reja yaratadigan sunʼiy intellekt platformasi ishlab chiqildi. Mazkur platformaning asosiy maqsadi, tuman va mahallalar kesimida iqtisodiy salohiyatni tahlil qilish, ustuvor biznes yoʻnalishlarni aniqlash hamda foydalanuvchilarga sunʼiy intellekt yordamida amaliy tavsiyalar berishdan iborat.
CRM tizimi va kredit konveyerini joriy etish yuzasidan
Jismoniy shaxslar uchun tezkor xizmat koʻrsatish uchun CRM tizimi yanada takomillashtirildi. Buning natijasida 2025-yilda 60 098 nafar mijozga toʻliq avtomatlashtirilgan tizim orqali 2 137 mlrd. soʻm miqdoridagi kredit mablagʻlari ajratildi.
Aholiga chakana xizmatlar koʻrsatish boʻyicha
Bugun bank tomonidan ikkilamchi bozordan uy-joy sotib olish uchun 21,55 foizdan boshlab ipoteka kreditlari ajratilishi yoʻlga qoʻyildi. Bu esa tijorat banklari tomonidan ikkilamchi bozor uchun taqdim etilayotgan eng past foiz stavkalardan biri hisoblanadi. Shuningdek, birlamchi bozordan uy-joy sotib olish uchun ipoteka kredit foiz stavkasi 17 foizgacha pasaytirildi.
Avtomobil xarid qilish uchun “Premium avtokredit” mahsuloti doirasida Mercedes-Benz, BMW, Toyota, Nissan, Porsche va boshqa premium avtomobillarni sotib olish uchun 2 mlrd. 60 mln soʻmgacha avtokredit ajratilishi yoʻlga qoʻyildi. Shuningdek, KIA, Chery, Haval, Changan va bir qator UzAuto Motors avtomobillari uchun 0 foizdan boshlab avtokreditlar taklif etilmoqda.
Bank strategiyasidagi loyihalar toʻgʻrisida
Mikrokreditbankni rivojlantirishning yaqin 3 yildagi (2026-2028) bosh maqsadi — anʼanaviy bank tizimidan toʻliq raqamli, mijozga yoʻnaltirilgan va moliyaviy jihatdan oʻta barqaror ekotizimga aylanishdir. Shu maqsadda, strategiya doirasida jami 38 ta yirik transformatsion loyihani amalga oshirishi boshlandi.
Jumladan:
Birinchisi bugun bozorda juda katta talab mavjud boʻlgan Islomiy moliyalashtirish xizmatlarini joriy etish loyihasidir. Loyiha 2027-yil yakuniga qadar bosqichma-bosqich toʻliq amalga oshiriladi.
Ikkinchi strategik loyiha — bu kelajak avlod uchun moʻljallangan “Junior Banking”, yaʼni bolalar va oʻsmirlar uchun raqamli bank tizimidir. Bu loyiha bankning kelajakdagi mijozlar bazasini yaratish mexanizmidir.
Kreditlashda “AI Scoring” amaliyotini qoʻllash
Bank Strategiyasida kreditlash jarayonlariga sunʼiy intellektga asoslangan skoring tizimini joriy etishni rejalashtirgan. Mazkur yechim mijozlarning kreditga layoqatini yanada aniq baholash, qaror qabul qilish tezligini oshirish, inson omili bilan bogʻliq xatolarni kamaytirish hamda kredit risklarini samarali boshqarish imkonini beradi.
Face ID texnologiyasini integratsiya qilish boʻyicha
Face ID tizimi loyihasi bankka tashrif buyuruvchi mijozlarni tezkor identifikatsiya qilish, ular toʻgʻrisidagi maʼlumotlarni qayta ishlash orqali xizmat koʻrsatish sifatini oshirish hamda bank operatsiyalarini amalga oshirishda yuqori darajadagi xavfsizlikni taʼminlashga qaratilgan.
Matbuot anjumani davomida bank mutasaddilari tomonidan ommaviy axborot vositalari vakillarining savollariga batafsil javob qaytariladi.
Bank Axborot xizmati
Yana ko‘ring
Mikrokreditbank tomonidan aholi bandligini taʼminlash va kambagʻallikni qisqartirish boʻyicha amalga oshirilayotgan ishlar
SIRDARYODA BRIFING O‘TKAZILADI
