Joriy yilning 13-iyun kuni bank Axborot xizmati rahbari S.Ochilov ishtirokida “Mikrokreditbank" ATBda oilaviy tadbirkorlik dasturlari doirasida amalga oshirilayotgan ishlar mavzusida brifing tashkil etildi.
Maʼlumki, Mikrokreditbank oilaviy tadbirkorlik dasturlari doirasida aholiga imtiyozli kreditlar ajratib kelayotgan banklar qatoriga kiradi.
Bu borada davlatimiz rahbari tomonidan aniq belgilab berilgan topshiriqlar asosida hududlarda tadbirkorlikni qoʻllab-quvvatlash, oilaviy tadbirkorlikni rivojlantirish borasida bir qator ishlar amalga oshirilmoqda.
Xususan, 2024-yilda bank tomonidan oilaviy tadbirkorlikni rivojlantirish yoʻnalishida 2,0 trln.soʻm imtiyozli kreditlar ajratilishi koʻzda tutilgan boʻlib, 1-iyunga qadar 46 500 ta subyektga jami 781 mlrd. soʻm kreditlar (shundan, 29 ta yuridik shaxslarga 5,1 mlrd. soʻm, 46 470 ta jismoniy shaxslarga 775,8 mlrd. soʻm) ajratilishi natijasida 46 539 nafar aholi bandligi taʼminlandi.
Ajratilgan kreditlar quyidagi sohalarga yoʻnaltirilgan. Jumladan:
- xizmat koʻrsatish sohasida 204,1 mlrd. soʻm (26 %);
- ishlab chiqarish sohasida 172,2 mlrd. soʻm (22 %);
- qishloq xoʻjaligi sohasida 391,3 mlrd. soʻm (50 %);
- boshqa sohalarga 13,4 mlrd. soʻm (17%) kredit ajratilgan.
Shuningdek, yil yakuniga qadar aholi va tadbirkorlik subyektlarining talablariga asosan 1,2 trln.soʻm imtiyozli kredit ajratilishi kutilmoqda.
Shu bilan birga, ushbu kreditlarning 296,5 mlrd. soʻmi 16 886 nafar yoshlar hamda 390,0 mlrd. soʻmi 26 270 nafar xotin-qizlarning loyihalariga yoʻnaltirilgan.
Maʼlumot oʻrnida, dastur doirasida ajratilgan kreditlarning 38 foizi yoshlar hissasiga toʻgʻri keladi. Shuningdek, yoshlarga ajratilgan kredit 2023-yilga nisbatan 1,1 barobarga, kredit olgan yoshlar soni 3,5 ming nafarga ortgan.
2024-yilda hududlarda “Temir daftar” “Ayollar daftari” hamda “Yoshlar daftari”ga kiritilgan aholining ehtiyojmand qatlamiga biznes loyihalarni taqdim etish, tadbirkorligiga koʻmaklashish orqali 5 608 nafar aholiga 67,3 mlrd. soʻm imtiyozli shartlarda kredit ajratilib, ularning bandligi va daromad manbai taʼminlandi (“Ayollar daftari” 5 283 tada 62,2 mlrd. soʻm va “Yoshlar daftari” 325 tada 5,1 mlrd.soʻm).
Bank tomonidan bundan keyin ham ijtimoiy dasturlar doirasida imtiyozli kreditlar ajratish orqali aholi bandligini taʼminlash hamda ularni ijtimoiy qoʻllab-quvvatlash ishlari davom ettiriladi.
