Bitiruvchilar bandligi ta’minlanmoqda

Pastdarg‘om pedagogika va sport kasb-hunar kollejini joriy yilda 516 nafar o‘g‘il-qiz bitirmoqda. Ularni ish bilan ta’minlash borasida kollej rahbariyati va hamkor tashkilotlar tomonidan izchil tadbirlar amalga oshirilib, bitiruvchilar bandligi to‘liq ta’minlanmoqda.

Mazkur kollejda jismoniy tarbiya va bolalar sporti murabbiyi, ixtisoslashtirilgan (maxsus) boshlang‘ich ta’lim muassasasi tarbiyachisi, milliy, etnografik va badiiy liboslar dizayneri, maktabdan va sinfdan tashqari tarbiyaviy ishlar tashkilotchisi, maktabgacha ta’lim muassasalari tarbiyachisi, musiqa xodimi, arxivshunos va ish yurituvchi kabi yo‘nalishlarda ta’lim beriladi.

Ayni paytda kollej bitiruvchilarining 200 nafardan ziyodi uch tomonlama shartnoma bo‘yicha tumandagi ta’lim muassasalari, korxona-tashkilotlarda ish boshlash arafasida turibdi. Bundan tashqari bitiruvchilar orasida banklardan imtiyozli kredit olib, tadbirkorlik faoliyatini yo‘lga qo‘yish istagidagi yigit-qizlar ham ko‘pchilikni tashkil etadi. Kollej direktori Nigora Sadinovaning aytishicha, joriy o‘quv yilida yuzdan ortiq bitiruvchilar tadbirkorlik bilan shug‘ullanish istagini bildirgan. Ularning 80 nafariga «Mikrokreditbank» OATB Juma filialining imtiyozli kredit berish to‘g‘risidagi sertifikati topshirildi.