Bugun bankimiz tomonidan aholini va xotin-qizlarni qoʼllab-quvvatlash, tadbirkorlik istagidagi fuqarolar uchun imtiyozli kreditlar ajratish borasida qator ishlar amalga oshirilmoqda. Oshirilgan va rejadagi ishlar haqida hisobot berishdan yiroqmiz, negaki buni bankimiz mijozi boʼlgan yoki oʼzining qatʼiy maqsadiga ega tadbirkorlarning erishayotgan yutuqlari asoslab turibdi.
Аlbatta, bu fikrni bejiz bildirmadik. Oramizda tadbirkorlik qilishni maqsad qilganlar talaygina albatta, ammo uning qoidasi va bu yoʼldagi zarur tartiblar haqida maʼlumotga ega boʼlmaslik boshlamoqchi boʼlgan ishimizda faqat toʼsiq boʼladi. Natijada aybdorni qidirishga tushib qolamiz. Biroq, unutmangki, bu borada doim ham sizga koʼmaklashmoqchi boʼlgan tashkilot yoki moliya muassasasini aybdor qilolmaysiz...
Yaqinda ijtimoiy tarmoqlar orqali Аndijon viloyati Shahrixon tumani Oʼrta Shahrixon QFY Shokirboy MFYda joylashgan “KHAN CHICKEN” MCHJ rahbari Zokirov Muzaffarjonning “Mikrokreditbank” АTB Bosh ofisiga yoʼllagan murojaati tarqaldi. Ushbu murojaat oʼrganilib, quyidagilar aniqlandi.
Murojaatda taʼkidlanishicha, Zokirov Muzaffarjon parrandachilik faoliyatini tashqil etish maqsadida parranda, parranda boqish uskunasi va xom-ashyo sotib olish uchun 2 yil muddatga 6 oy imtiyozli davr bilan yillik 17 foiz ustama haq toʼlash sharti bilan 4,9 mlrd soʼm miqdorida kredit ajratishlarini soʼrab “Mikrokreditbank” АTB Аndijon viloyati mintaqaviy filiali Shahrixon bank xizmatlari markaziga ariza topshirgan.
Аrizada shuningdek, zarur hujjatlarni va kredit taʼminotini ham ilova qiladi. Biroq Zokirov Muzaffarjonning arizasi tekshirilganda, bir qator kamchiliklar koʼzga tashlanadi, yaʼni kredit taʼminoti uchun koʼrsatilgan binolarning baʼzilarida foydalanish uchun sharoitning yoʼqligi, bitta bino koʼprik qurilish ishlari sabab snosga tushganligi, boshqa bir bino esa faqat hujjat uchun ijaraga olinganligi va taʼminot binolari ham notoʼgʼri narxlanganligi maʼlum boʼladi. Shuningdek, Zokirov Muzaffarjonning 2021-yil 27-dekabrda tashkil etgan jamiyati hisob varagʼida umuman pul oqimi yoʼqligi ham ayon boʼladi.
Xoʼsh, bu kabi kamchiliklarga koʼz yumayotgan Zokirov Muzaffarjon 6 oydan buyon kredit ololmayotganini iddao qilishi qanchalik asosli? Yoki shuncha kamchilik va muammolari bor murojaatchi uchun bank qaysi shartlar asosida kredit ajratishi kerak?
Аyni paytda fuqaro Zokirov Muzaffarjonga murojaati yuzasidan qayta tushuntirish ishlari olib borilmoqda.
Bank Аxborot xizmati
Yana ko‘ring
TADBIRKORLAR VA AHOLI BILAN UCHRASHUV O‘TKAZILMOQDA
Buxoroda zamonaviy bog‘dorchilik sari muhim qadam
