Ma’lumki, Mikrokreditbank tomonidan Yaponiya xalqaro hamkorlik agentligi (JICA)dan jalb etilgan mablag‘lar hisobidan yurtimizda “Meva-sabzavotchilik tarmog‘ida qo‘shilgan qiymat zanjirini yaratishni rivojlantirish (2-bosqich)” loyihasi doirasida tadbirkorlarga kreditlar ajratib kelinmoqda.
Mazkur kredit liniyasi mablag‘lari hisobidan Buxoro viloyatida 22,5 mlrd. so‘mlik loyiha amalga oshirilib, meva sharbati hamda salqin ichimliklar ishlab chiqarish yo‘lga qo‘yiladi.
Ushbu loyiha tashabbuskori “Gijduvan Eco Bottlers” MChJning yagona ta’sischisi va rahbari Alisher G‘ulomov bo‘lib, bu ishlar G‘ijduvon tumani Baraka MFY, Oltinsoy ko‘chasida amalga oshiriladi.
– Sir emaski, yurtimizda quyoshli kunlar ko‘p, mevalarimiz esa shirin, – deydi – A.G‘ulomov. – Bu esa biz tadbirkorlar uchun mavjud imkoniyatlar yetarlicha ekanligidan dalolat beradi. Ya’ni o‘zimizda sifatli mevalar ko‘p va shunga yarasha xaridorlar ham kam emas. Qolaversa, xorijda ham bizda yetishtirilgan mevalardan tayyorlangan sharbatlarga talab yuqori. Bu esa kelgusida ushbu mahsulotlarni eksportga chiqarish imkonini ham beradi.
Muhimi, G‘ijduvon tumanida amalga oshirilayotgan mazkur loyiha ishga tushishi natijasida korxonada 30 ta yangi ish o‘rni yaratilib, ishchilar soni 60 nafarga yetadi. Korxonada yiliga 6 ming tonnadan ortiq meva sharbati hamda salqin ichimliklar ishlab chiqarish imkoniyati yaratiladi.
Ma’lumot uchun, Mikrokreditbank tomonidan Yaponiya xalqaro hamkorlik agentligi (JICA)dan yurtimizda “Meva-sabzavotchilik tarmog‘ida qo‘shilgan qiymat zanjirini yaratishni rivojlantirish (2-bosqich)” loyihasi doirasida 18 mln AQSH dollari miqdorida kredit jalb etilgan bo‘lib, loyiha doirasida bank tomonidan ayni paytda 4 yilgacha imtiyozli davr bilan 14 yil muddatgacha kreditlar ajratib kelinmoqda.
Bank Axborot xizmati
Yana ko‘ring
Rahbar va yoshlar uchrashuvi: tibbiyot muassasasida
Korporativ bank kartalari: tezkorlik, shaffoflik va qulay boshqaruv
