Buxoro shahridagi "Sahid Zarafshon" mehmonxonasida "Mikrokreditbank" ATB tashabbusi bilan "Rahbar va yoshlar uchrashuvi" boʻlib oʻtdi.
Bu galgi muloqotning oʻziga xosligi shundaki, unda nafaqat murojaat va muammolar eshitildi, balki yoshlar tomonidan kelajakka yoʻnaltirilgan innovatsion gʻoyalar, startaplar, tadbirkorlik tashabbuslari, ilmiy yondashuvlar asosidagi takliflari bilan boyitildi.
Tadbirda toʻrt muhim yoʻnalish boʻyicha rahbarlar ishtirok etdi:
"Mikrokreditbank" ATB Boshqaruv raisi oʻrinbosari Shaxlo Ibragimova,
Buxoro viloyat hokimi oʻrinbosari — Oila va xotin-qizlar masalalari boshqarmasi rahbari Hafiza Artikova,
Buxoro viloyati Ekologiya, atrof-muhitni muhofaza qilish va iqlim oʻzgarishi boshqarmasi boshligʻi Jamol Nosirov,
Viloyat Yoshlar ishlari boshqarmasi boshligʻi Shavkat Rahmonov.
Rahbarlar viloyatning turli hududlaridan tashrif buyurgan 300 nafardan ortiq faol yoshlar bilan ochiq muloqot oʻtkazishdi.
Uchrashuv jarayonida yoshlar tomonidan 20 dan ziyod yangi taklif va biznes loyihalalar ilgari surildi. Ayniqsa, buxorolik faol qizlar tomonidan taqdim etilgan innnovatsion biznes loyihalarning ilmiy hamda amaliy jihatdan aniq va puxta ishlab chiqilganligini eʼtirof etish mumkin. Mazkur loyihalarni qoʻllab-quvvatlash orqali mamlakatimizda yosh tadbirkor qizlarimiz safini kengaytirish va bu orqali yangi ish oʻrinlari yaratishga erishiladi.
Taʼkidlash joizki, uchrashuvda "Mikrokreditbank" ATB tomonidan yoshlar, xususan, xotin-qizlar tadbirkorligini qoʻllab-quvvatlash, kredit dasturlari, moliyaviy savodxonlik va startaplarni moliyalashtirish masalalari boʻyicha atroflicha maʼlumotlar berildi.
Shaxlo Ibragimova oʻz chiqishida bank tomonidan yoshlarga, xususan, xotin-qizlar tadbirkorligini qoʻllab-quvvatlash boʻyicha yaratilayotgan imkoniyatlar va amaliy yordamlar haqida toʻliq maʼlumot berib, tadbirkorlikni boshlashdagi muhim jihatlar yuzasidan tavsiyalari bilan oʻrtoqlashdi.
Bu maʼlumotlar yoshlar uchun katta amaliy yoʻnalish boʻlib xizmat qildi.
Bank Axborot xizmati
Yana ko‘ring
Rahbar va yoshlar uchrashuvi: tibbiyot muassasasida
Korporativ bank kartalari: tezkorlik, shaffoflik va qulay boshqaruv
