Fuqaro Tillo Normurodov 83 yoshli Gulboyev Boytoʻra “Mikrokreditbank” ATB Qumqoʻrgʻon filialiga jamgʻarma omonatiga naqd pul mablagʻini qoʻyib bank tomonidan ushbu mablagʻ oʻzlashtirilgani hamda huquqni muhofa qiluvchi organlar tomonidan qonuniy tartibda koʻrib chiqilmaganligi yuzasidan ijtimoiy tarmoq (You Tube.com)qa murojaat qilgan. 

Mazkur murojaatni “Mikrokreditbank” ATB Surxondaryo viloyat mintaqaviy filiali xodimlari tomonidan o‘rganib chiqildi, bank mijozi fuqaro Gulboyev Boytura (marhum) tomonidan 2005-yil 27-mayda jamgʻarma omonatiga 1 million 600 ming so‘m miqdorida naqd pul mablagʻi kirim qilgan boʻlib 2012-yil 14-noyabr va 2013-yil 19-fevraldagi chiqim orderi bilan ushbu omonat mablagʻi chiqim qilingan va fuqaro Gulboev Boytura tomonidan omonat mablag‘i olib ketilgan. 

Fuqaro Gulboev Boytura “Mikrokreditbank” ATB Qumqo‘rg‘on filialiga qo‘yilgan omonatini olmaganligini vaj qilib Qumqo‘rg‘on tumani IIBga shikoyat ariza bilan murojaat qilgan. Tuman IIB tomonidan hujjatlarda fuqaro Gulboev Boyturaning imzosini aniqlash maqsadida Surxondaryo viloyat Ichki ishlar Boshqarmasi Ekspert kriminalistika boʻlimi ekspert xulosasi olingan. 

Ushbu chiqim orderiga qoʻyilgan imzo bilan Gulboev Boytoʻraning imzosi Surxondaryo viloyat Ichki ishlar Boshqarmasi Ekspert kriminalistika boʻlimi tomonidan 2018-yil 15-may kunida berilgan xulosasida xujjatlarga qoʻyilgan imzo fuqaro Gulboev Boyturaga tegishli ekanligi boʻyicha ekspert xulosa berilgan. Yuqoridagilardan kelib chiqib, fuqaro Gulboev Boytura tomonidan 2005-yil 27-mayda jamgʻarma omonatiga 1 million 600 ming so‘m miqdorida naqd pul mablagʻi, 2012-yil 14-noyabr va 2013-yil 19-fevraldagi chiqim orderi bilan ushbu omonat qaytarib berilgan.

Shuningdek, fuqaro Tillo Normurodovning You Tube.com ijtimoiy tarmoqqa chiqishida bank mijozi bo‘lgan “Jo‘rabek Astonov” xususiy korxonasi tomonidan kredit uchun to‘langan 10 mln.so‘m pul mablag‘i bank xodimlari tomonidan o‘z manfaatlari uchun ishlatilganligi bir nech oy o‘tgandan keyin kredit qarzi uchun to‘langanligi aytib o‘tilgan.

Haqiqatan ham, “Jo‘rabek Astonov” xususiy korxonasi rahbari tomonidan 10 mln. so‘m miqdorida kredit qarzi uchun to‘langan pul mablag‘i bankning sobiq boshqaruvchisi tomonidan o‘z manfaati yo‘lida sarflab yuborilgan, viloyat filiali xodimlari tomonidan ushbu holat aniqlanib, 10 mln.so‘m pul mablag‘i “Jo‘rabek Astonov” xususiy korxonasining kredit to‘lovi uchun bank kassasiga kirim qilingan va bunday holat boshqa takrorlanmasligi uchun bankning sobiq boshqaruvchisi lavozimidan ozod etilgan.

“Jo‘rabek Astonov” xususiy korxonasi rahbari A.Astanov bilan suhbatlashilganda topshirilgan 10 mln. so‘m bo‘yicha hech qanday e’tirozi yo‘qligini bildirdi va o‘zining bildirgisi orqali buni tasdiqlagan. 

Shuningdek, “Jo‘rabek Astonov” xususiy korxonasiga tegishli bo‘lgan ISUZU rusumli 75 308 ZAA davlat belgili yuk avtomashinasini 2022-yil 30-avgustdan buyon sudning qarorisiz noqonuniy ravishda bank hovlisiga saqlanishi, natijada kredit qarzdorligi sun’iy oshib borganligi bo‘yicha e’tirozi ham o‘rganildi.

“Jo‘rabek Astonov” xususiy korxonasiga tegishli bo‘lgan, 2020-yilda ishlab chiqarilgan, davlat raqami belgisi  75 308 ZAA bo‘lgan ISUZU rusumli yuk avtomashinasi iddaoda keltirilganidek 2022-yil 30-avgustda emas, balki 2022-yil 3-noyabr kuni, Fuqarolik ishlari bo‘yicha Qumqo‘rg‘on tumanlararo Sudining qarzni undirish haqidagi №2-1904-2201/6802-sonli Hal qiluv qarori hamda Ijro varaqasiga asosan kredit qarzdorligini undirishni tezlashtirish va ta’sirchan choralari ko‘rish maqsadida bank hamda Majburiy ijro byurosi Qumqo‘rg‘on tumani bo‘limi xodimlari bilan birgalikda mol-mulkni ro‘yxatga olish va xatlash to‘g‘risidagi Dalolatnomaga asosan xatlanib, bank binosiga olib kelingan.

 “Jo‘rabek Astonov” xususiy korxonasi tomonidan bank oldidagi muddati o‘tgan foiz va asosiy kredit qarzdorligi to‘liq yopilgandan so‘ng, xususiy korxonaga tegishli bo‘lgan ISUZU yuk avtomashinani olib ketishga ruxsat beriladi.


Bank Axborot xizmati