Internet va ijtimoiy tarmoqlar orqali fuqaro Abdushukur Qodir-Axunov oʻziga “Mikrokreditbank” ATB tomonidan ombor qurish, muzlatgich va trasformator sotib olish uchun 1 000 000 000 (bir milliard) soʻm miqdorida yillik 14 foizli imtiyozli kredit berilmayotgani, “adolatsizlik qurboni” boʻlayotgani haqida murojaat yoʻllagan. Ushbu murojaat yuzasidan Bank Axborot xizmati quyidagilarni maʼlum qiladi.
Bank mutaxassislari tomonidan o‘rganilganda “Shunqorboy-11” oilaviy korxonasi rahbari A.Qodir-Axunovning kredit olish boʻyicha qilgan murojaatlari Oʻzbekiston Respublikasining “Jismoniy va yuridik shaxslarning murojaatlari toʻgʻrisida”gi Qonun talablari asosida oʻrganib chiqilganda “Mikrokreditbank” ATB va A.Qodir-Axunov oʻrtasida tuzilgan kredit shartlari muntazam ravishda buzib kelinganligi aniqlandi.
Ushbu fuqaroga dastlabki kredit mablagʻlari “Mikrokreditbank” ATB Andijon viloyat hududiy boshqarmasi Andijon bank xizmatlar ofisi tomonidan 2017-yil 14-fevralda 150 million soʻm miqdorda ajratilgan edi. Biroq fuqaro kredit toʻlovlarini oʻz vaqtida amalga oshirmaganligi sababli “Mikrokreditbank” ATB Andijon viloyat hududiy boshqarmasi tomonidan sudga murojaat qilingan. Sud tomonidan bank daʼvosi qanoatlantirilib, kreditni undirish uchun garovga qoʻyilgan mulkka qaratilgan. Fuqaro kredit toʻlovlarini soʻndirmasdan va garovga qoʻyilgan mulklarning ijro xatti-harakatlariga har xil vajlar bilan majburiy ijro harakatlariga toʻsqinlik qilgan. Fuqaro toʻlov imkoniyati yoʻqligini vaj qilib, Andijon viloyati hokimligiga murojaat qilgach, Viloyat hokimi tomonidan homiylar hisobidan 2021-yil 14-iyunda fuqaroning bank oldidagi qarzdorligi toʻliq qoplab berilgan.
Shundan soʻng A.Qodir-Axunov sobiq Investitsiya vaziri S.Umrzoqovning tadbirkorlar bilan oʻtgan uchrashuvida murojaat qilgach, unga trikotaj mahsulotlarini ishlab chiqarish maqsadida 84 oy muddatga 1 000 000 000 (bir milliard) soʻm miqdorida foizsiz mablag‘ ajratilgan. Mazkur foizsiz kredit mablagʻi ajratish shartnomasiga koʻra, Andijon shahar Bogʻishamol avtomobil bozori hududida joylashgan oshxona bino-inshootiga nisbatan taqiq qoʻyish, taqiqni kredit shartnomasiga asosan olingan kredit toʻlovlari toʻliq qaytarilgandan soʻng bekor qilish koʻrsatilgan.
Ammo endilikda fuqaro Qadir-Axunov farzandi nomiga yana 1 millliard soʻm miqdorda imtiyozli kredit rasmiylashtirishni soʻrab, oldingi kredit uchun garov taʼminoti sifatida olingan binoda omborxona tashkil qilish maqsadi borligini bildirgan.
Bosh bankning 2023-yil 19-oktabrdagi 34/16857-sonli xatiga asosan “Shunqorboy 11” OKga taqiqda boʻlgan inshoot oʻrnida muzlatkichli omborxona qurishga ruxsat berilmasligi koʻrsatilgan.
Eslatib oʻtamiz, fuqaroning turmush oʻrtogʻi Qadiroxunova Nasibaga tikuvchilik faoliyatini rivojlantirish maqsadida ajratilgan 30 million soʻmlik imtiyozli kredit ham oʻz vaqtida soʻndirilmagan va bugungi kun holatida fuqaroning 15 milllion soʻm miqdordagi muddati oʻtgan qarzdorligi mavjud. Ushbu qarzdorlikni undirish uchun bank tomonidan sud organlariga davo arizasi kiritilgan. Bank daʼvosi sud tomonidan qanoatllantirilib, hozirda majburiy tartibda ijro harakatlari olib borilmoqda.
Yuqoridagilardan kelib chiqib, fuqaro Qadir-Axunov Shukurjon Abdurasulovichni “Mikrokreditbank” ATB Andijon bank xizmatlari ofisidan kredit olish boʻyicha qilgan barcha murojaatlari qonuniy hujjatlarga asosan rad qilinib kelinmoqda.
Bank Axborot xizmati
Yana ko‘ring
MKBANK: murojaat — e’tiborda, yechim — amalda!
Biznes boshlash uchun imkoniyatlar bir joyda!
