Fuqaro roziligi bilan onlayn platforma orqali imtiyozli kredit ajratilgan

Bugun ANTIKORRUPSIYA Telegram kanalida fuqaro Kadirova Shoira G‘ulomovnaning murojaati e’lon qilindi. 

Unga ko‘ra, fuqaro Mikrokreditbankning Qoraqalpog‘iston Respublikasi, Ellikqal’a filialidan 33 mln. soʻm kredit olish uchun ariza berganligi, biroq kredit mablag‘larini olmagani, hokim yordamchisi aynan Kadirova Shoira nomidan kredit mablagʻini olib shaxsiy manfaatlari yoʻlida sarflab yuborgani iddao qilingan. 

Mazkur murojat bank mutaxassislari tomonidan o‘rganilganda quyidagilar ma’lum bo‘ldi. Ma’lumki, O‘zbekiston Respublikasi Vazirlar Mahkamasining “Oilaviy tadbirkorlikni rivojlantirish dasturlarining yagona elektron platformasi orqali kreditlar ajratish tartibi to‘g‘risidagi nizomni tasdiqlash haqida”gi 2022-yil 8-iyuldagi №373-sonli qarori boʻyicha imtiyozli kreditlar onlayn platforma orqali ajratiladi. 

Bunda, fuqarolar shaxsiy elektron raqamli imzosi bilan platforma orqali ariza beradi, kredit shartnomasi va ta’minotchi korxona bilan oldi-sotdi shartnomasi, shuningdek, mahsulotlarni olganligi toʻgʻrisida hisob-fakturalarni imzolaydi. Shundan soʻng mahalladagi hokim yordamchisi fuqaro xonadoniga borib hisob-fakturada koʻrsatilgan mahsulotlar haqiqatda olinganligini oʻrganib, dalolatnoma rasmiylashtiradi va foto rasmlari bilan onlayn platformaga yuklaydi. Undan keyin esa tijorat banklari tomonidan onlayn platforma orqali kelib tushgan va hokim yordamchisi tomonidan imzolangan dalolatnoma hamda foto rasmga asosan, kredit mablagʻi ta’minotchi korxona hisob raqamiga pul koʻchirish yoʻli bilan oʻtkazib beriladi. 

Xuddi shu tartibga asosan, hokim yordamchisi tomonidan 2022-yil 13-dekabr kuni fuqaro Sh.Kadirovaning xonadoniga borib, hisob-fakturada koʻrsatilgan mahsulotlar haqiqatdan olinganligi o'rganilgan va onlayn platformaga fuqaro ushbu mahsulotlardan qanoat hosil qilganligi to‘g‘risida dalolatnoma va foto rasmlar yuklangan. 

Mikrokreditbank tomonidan 2022-yil 14-dekabr kuni belgilangan tartib asosida 33 mln. soʻm kredit mablagʻi ajratib berilgan va jarayon toʻliq onlayn tartibda amalga oshirilgan. 

Xulosa qilib aytganda, mazkur fuqaroga belgilangan tartib asosida imtiyozli kredit ajratilganligini ma’lum qilamiz. 

Bank Axborot xizmati