Ijtimoiy tarmoqlarda “Mikrokreditbank” ATB tomonidan garov mulki sud qaroriga qaramay taqiqdan chiqarilmayotgani haqida xabarlar tarqaldi.
Mazkur holat yuzasidan ma’lum qilamizki, fuqarolik ishlari bo‘yicha Andijon viloyat Izboskan tumanlararo sudining 2023-yil 10-oktabrdagi hal qiluv qaroriga asosan kredit qarzdorligini undirish hamda undiruvni garov mulklariga qaratish belgilangan. Ushbu sud qarori qonuniy kuchga kirgan bo‘lib, hozirgi kunga qadar bekor qilinmagan.
Shu bilan birga, 2024-yil 30-avgustdagi sud qarori bilan garov (ipoteka) shartnomasining ayrim bandlari haqiqiy emas deb topilgan. Mazkur qaror Andijon viloyat sudi apellyatsiya instansiyasi tomonidan 2024-yil 12-dekabrda o‘zgarishsiz qoldirilgan.
Biroq, sud hujjatlarida ko‘chmas mulkni taqiqdan chiqarish bo‘yicha alohida ko‘rsatma mavjud emas. Amaldagi qonunchilikka muvofiq, bunday cheklovlarni bekor qilish faqat tegishli vakolatli organlar tomonidan sud hujjatlari yoki ijro harakatlari asosida amalga oshiriladi.
Shu sababli, bank tomonidan mustaqil ravishda taqiqni bekor qilish imkoniyati mavjud emas.
Hozirgi vaqtda mazkur masala yuzasidan yuqori sud instansiyalariga murojaat qilish hamda huquqiy aniqlik kiritish choralari ko‘rilmoqda. Barcha jarayonlar amaldagi qonunchilik doirasida olib borilmoqda.
“Mikrokreditbank” ATB o‘z faoliyatida qonun ustuvorligi va shaffoflik tamoyillariga qat’iy amal qiladi.
Bank Axborot xizmati
Yana ko‘ring
Arnasoyda aholi daromadini oshirishga qaratilgan loyihalar kengaytirilmoqda
MKBANK va Belarus elchisi — yangi hamkorlik imkoniyatlari sari
