Bugungi kunda aholining turmush farovonligini yanada yaxshilash, avvalo, ularning daromadlarini oshirish, yangi ish oʻrinlari yaratish, mahallalarda kasanachilikni tashkil etish va rivojlantirish orqali mahsulot ishlab chiqarish hamda xizmatlar koʻrsatish koʻlamini kengaytirish boʻyicha “Mikrokreditbank” ATB tomonidan tadbirkorlar moliyaviy qoʻllab-quvvatlanmoqda. Gʻijduvonlik Dilnoza Saidova rahbarligidagi Nodirabegim tikuv korxonasi bunga bir misol.
Tadbirkor Dilnoza Saidova dastlab faoliyatini 2021-yilning fevral oyida bank tomonidan ajratilgan kredit mablagʻlari asosida 7 ta tikuv mashinasi sotib olish bilan boshladi.
Kichkinagina sexida ishlab chiqarilayotgan mahsulotlar sifatli va hamyonbop boʻlgani uchun ham qisqa fursatda oʻz xaridorlariga ega boʻldi. Dilnoza qoʻshimcha mablagʻ sarflab zamonaviy tikuv dastgohlari sotib oldi va ustoz-shogird maktabi asosida mahallasidagi ishsiz xotin-qizlarni ham ishga jalb qila boshladi.
Joriy yilning may oyida “Mikrokreditbank” ATB homiyligida kasanachilikni qoʻllab-quvvatlash maqsadida mazkur tikuv sexi uchun keng va shinam 150 oʻrinli bino qurib berildi.
Dilnoza Saidovaning kelajak rejalari ham katta. U xotin-qizlar uchun moʻljallangan liboslar tikish bilan chegaralanib qolmoqchi emas. Endilikda u erkaklar kiyim boshlari, kostyum-shimlari, maxsus formalar va bolalar kiyim-kechaklarini ham ishlab chiqarmoqchi va kelgusida ish oʻrinlarini ming nafarga yetkazmoqchi.
Jondor tumani Ushot mahallasida yashovchi Shahnoza Sharipova esa kashtachilik hunari bilan bolaligidan shugʻullanib keladi. Momomeros boʻlgan hunari bugun Shahnoza uchun daromad manbaiga aylangan. U faoliyatini 2022-yilda “Mikrokreditbank” ATB Buxoro viloyati Jondor BXM tomonidan oilaviy tadbirkorlikni rivojlantirish dasturlari doirasida 33 mln.soʻm imtiyozli kredit mablagʻi olib boshlagan edi. Kredit mablagʻlarini oʻz vaqtida soʻndirib, 2023-yilda qiymati 500 million soʻm boʻlgan “Voris kashtachilari” loyihasini amalga oshirdi.
- Oʻtgan 2023-yilda tumanimizda yana bir yangi faoliyat turi - “Voris kashtachilari" hunarmandchilik markazida charm mahsulotlari ishlab chiqarish faoliyatini ham yoʻlga qoʻydik. Dastlab bu yerda 15 nafar xotin-qizlar mehnat qilgan boʻlsa, endilikda ular soni 60 nafarda oshgan, - deydi Shahnoza Sharipova.
Birgina Buxoro viloyati boʻyicha “Mikrokreditbank” ATB tomonidan joriy yilning o‘tgan davrida “Har bir oila tadbirkor” dasturi doirasida 9,3 mlrd. soʻm miqdordagi kredit mablagʻlari ajratilib, kasanachilik va tikuvchilik yoʻnalishida 1000 nafardan ortiq ishsiz aholining bandligi taʼminlandi. Mikrokreditbank aholi daromadlarini oshirish, xotin-qizlarni, ishsiz opa-singillarimizning qoʻshimcha daromadga ega boʻlishlarini taʼminlash boʻyicha moliyaviy qoʻllab-quvvatlashda davom etadi.
Bank Axborot xizmati
Yana ko‘ring
MAVRID TEZDA: xalqaro pul o‘tkazmalarini Mavrid orqali amalga oshiring
O‘z biznesingizni boshlash uchun 30 mln so‘mgacha!
