Korrupsiya va poraxoʻrlik oʻrtasidagi farqni bilasizmi?

Korrupsiya - mamlakatning makroiqtisodiy rivojlanish koʻrsatkichiga eng katta salbiy taʼsir qiluvchi illat boʻlib, uning koʻrinishlari turlicha boʻlishi mumkin (poraxoʻrlik, tovlamachilik, firibgarlik, nepotizm va h.k).

Ilmiy risolalarda korrupsiyaga bunday taʼrif berilgan. Korrupsiya (lotincha “corrumpere” - buzilish, aynish, tanazzul) oʻz mansab mavqeidan foydalanib, manfaat koʻrishdir.

Misol uchun, mansabdor shaxsning oʻz vakolatini suiisteʼmol qilib, tenderda oʻziga tegishli yoki kelishilgan holda biror bir kompaniyaga imtiyoz berish, noqonuniy ruxsatnoma berish, xizmatdan noxolis foydalanish kabilar. 

Poraxoʻrlik esa korrupsiyaning bir turi boʻlib, aynan pora olish-berish (pul, mol-mulk, xizmat yoki boshqacha bir naf olish) orqali amalga oshiriladigan jinoyatdir.

Pul, qimmatbaho sovgʻa, moddiy boyliklar, pora oluvchiga qaytarmaslik sharti bilan, lekin mulkiy mohiyatga molik boʻlgan (masalan, taʼmirlash, qurilish, qayta tiklash ishlarini bajarib berish va boshqalar) xizmatlar pora predmeti boʻlishi mumkin.

Ikkalasining farqi nima?
Korrupsiya keng tushuncha, unga poraxoʻrlik, mansabni sotish, noqonuniy imtiyozlar berish va boshqa barcha korrupsion jinoyatlar kiradi.

Poraxoʻrlik esa korrupsiyaning eng keng tarqalgan va aniq koʻrinishi boʻlib, pora olish yoki berishga asoslanadi. 

Oʻzbekiston Respublikasining “Jinoyat Kodeksi”ga koʻra, pora olish, pora berish va pora olish-berishda vositachilik qilish BHMning 100 baravarigacha jarima yoki 15 yilgacha ozodlikdan mahrum qilish bilan jazolanadi.