Parrandachilik chorvachilik sohasining asosiy tarmoqlaridan biri hisoblanadi. Respublikamizda parrandachilikni rivojlantirishga qaratilgan eʼtibor bugun soha rivojiga muhim turtki boʻlmoqda. Oxirgi yillarda Prezidentimizning bir qator qarorlari qabul qilinib, sohada parranda goʻshti va isteʼmol tuxumi ishlab chiqarish salmogʻi oshdi.
Ta’kidlash kerakki, respublikada 2024-yilda aholining isteʼmol tuxumiga boʻlgan talabi 115 foizga, parranda goʻshtiga boʻlgan talabi 106 foizga taʼminlandi.
Xususan, Andijon viloyatida 58,5 ming tonna parranda goʻshti va 774 mln dona isteʼmol tuxumi ishlab chiqarildi.
Viloyatda parrandachilik yoʻnalishida faoliyat yuritayotgan korxonalar soni 84 tani tashkil etib, shundan 26 tasi goʻsht va 58 tasi tuxum yoʻnalishidagi korxonalar hisoblanadi.
2025-yilda viloyatda parranda bosh soni 11,2 mln boshga yetkazilib, oʻtgan yilga nisbatan 102 foizga oʻsishi taʼminlanadi.
Joriy yilda umumiy qiymati 198 mlrd soʻmlik 18 ta loyiha amalga oshirilib, natijada 2,4 mln bosh parranda, 141 mln dona tuxum va 1,9 ming tonna qoʻshimcha parranda mahsulotlari yetishtirish quvvatlari yaratiladi.
Misol uchun, Asaka tumanidagi “Baraka hamkor parranda” xususiy korxonasi amalga oshirayotgan loyiha hisobiga goʻsht yetishtirish quvvati
11,2 ming tonnaga yetkaziladi. Shuningdek, korxonada zamonaviy uslubda yiliga 87 ming tonna omuxta-yem ishlab chiqarish quvvati ishga tushiriladi.
Natijada omuxta-yem sarfi 5 foizga, elektr energiya sarfi 3 barobarga va har bir kilogram goʻsht yetishtirish tannarxida gaz sarfi 4 barobarga qisqaradi.
Yetishtirilgan parranda goʻshti mahsulotlari Tojikiston, Qirgʻiziston, Afgʻoniston va Xitoy davlatlariga eksport qilinishi rejalashtirilgan.
Ushbu loyiha doirasida Mikrokreditbank va Parrandasanoat uyushmasi Andijon Qishloq xoʻjaligi va agrotexnologiyalar instituti masʼullari bilan parrandachilikda nazariy-amaliy bilimlarni bogʻlash hamda aholi xonadonlarida parranda boqishni tashkil etish yuzasidan muzokara oʻtkazildi.
Natijada parrandachilik xoʻjaliklariga Institut talabalarini biriktirish va ularni “Dual taʻlim” asosida amaliyotga bogʻlash mexanizmini yaratish boʻyicha kelishuvga erishildi.
Kelishuv doirasida, Institut bitiruvchilarini amaliyot jarayoniga bogʻlash va doimiy ish bilan taʼminlash maqsadida Asaka tumanidagi “Baraka hamkor parranda” xususiy korxonasida dastlabki oʻquv amaliy seminar tashkil etildi.
Natijada Andijon Qishloq xoʻjaligi va agrotexnologiyalar instituti va “Baraka hamkor parranda” xususiy korxonasi oʻrtasida bitiruvchi talabalarni “Dual taʻlim” asosida amaliyotga biriktirish maqsadida hamkorlik memorandumi imzolandi.
Bank Axborot xizmati
Yana ko‘ring
O‘z biznesingizni boshlash uchun 30 mln so‘mgacha!
MKBANK va SamAuto’dan katta yangilik!
