Ta’lim – har qanday millatning taraqqiyoti va kelajagini belgilaydigan asosiy omil. Shu bois "Nova Skul" asoschisi va direktori Zebo Mo‘minova o‘z oldiga sog‘lom, mustaqil qarorlar qabul qiladigan, jahon sivilizatsiyasi bilan hamnafas bo‘la oladigan vatanparvar avlodni kamolga yetkazish maqsadini qo‘ygan.
Toshkent shahrining Yunusobod tumanida tashkil etilgan "Nova Skul" klub shaklidagi ta’lim muassasasi bugungi kunda yuzlab o‘quvchilarni ta’lim bermoqda. Bu yerda nafaqat zamonaviy bilimlar beriladi, balki shaxsiy rivojlanishga qaratilgan maxsus dasturlar ham amalga oshiriladi. O‘qitish tizimi innovatsion yondashuv va eng yaxshi ta’lim metodlariga asoslangan. Mazkur loyiha "Mikrokreditbank"ning moliyaviy ko‘magi bilan ishga tushirilgan bo‘lib, bugungi kunda muvaffaqiyatli faoliyat olib bormoqda.
Bank Boshqaruv raisi o‘rinbosari Shaxlo Ibragimova "Nova Skul" faoliyati bilan yaqindan tanishib, o‘quvchilar uchun yaratilgan sharoit va imkoniyatlarni ko‘zdan kechirdi. Markaz rahbari bilan muloqot chog‘ida amalga oshirilayotgan ishlar, erishilgan yutuqlar va kelgusi rejalar haqida fikr almashildi.
Zebo Mo‘minova ta’lim sohasidagi tashabbuslarini yanada kengaytirib, bilingval ta’lim tizimidagi bolalar bog‘chasi hamda erta rivojlanish markazini ham tashkil etdi. Birgina "Nova Skul" loyihasini amalga oshirish uchun "Mikrokreditbank" tomonidan jami 650 ming AQSH dollari miqdorida kredit ajratildi. Ushbu mablag‘ binolarni ta’mirlash va jihozlash ishlariga sarflandi. Shuningdek, poytaxt Akademiyasi bolalar bog‘chasi loyihasi uchun ham 1,5 milliard so‘m miqdorida kredit mablag‘lari yo‘naltirildi.
Loyihaning umumiy qiymati 30 milliard so‘mni tashkil etadi. Tadbirkor o‘z faoliyatini yanada kengaytirish maqsadida "Mikrokreditbank" tomonidan jami 21 milliard so‘m imtiyozli kredit bilan ta’minlandi. Bu orqali 100 nafardan ortiq yangi ishchi o‘rinlari yaratildi.
Zebo Mo‘minova va "Nova Skul" jamoasi oldida ulkan maqsadlar turibdi – yangi avlodni yetuk mutaxassis va haqiqiy lider sifatida tarbiyalash. O‘z navbatida, "Mikrokreditbank" bu borada doimo ko‘mak berishga va ta’lim taraqqiyotiga hissa qo‘shishga tayyor.
Bank Axborot xizmati
