Madhiya – qalbida o‘z Vataniga muhabbat va sadoqat tuyg‘usi bor har qanday kishida milliy g‘urur, o‘ziga xos faxr, eng muhimi, yurtga mehr uyg‘otadi. Bu milliy timsolda xalqning o‘tmishi, buguni va kelajagi mujassam.
O‘zbekiston Respublikasi Davlat madhiyasi qabul qilinganligiga ham 30 yil to‘ldi. Shu munosabat bilan Mikrokreditbank ATBda ham bayram tadbiri tashkil etildi.
Tadbir bank jamoasining madhiyani kuylash bilan boshlanib, yurtning eng ulugʼ qoʼshigʼini eʼzozlash, yod olish va baralla kuylash har bir yurtdoshimizning burchi ekanligi, Qonunda madhiyamiz davlat suverenitetining ramzi, unga katta ehtirom bilan qarash har bir yurtdoshimizning vatanparvarlik burchidir deb belgilab qoʼyilgani ta’kidlandi.
Davlat timsollari, jumladan, davlat madhiyalari har bir mamlakatning kuch-qudrati, tarixi, anʼanalari, maʼnaviy dunyosini oʼzida ifodalaydi.
Oʼzbekiston davlat madhiyasi yangraganda, «Serquyosh» soʼzi jaranglashi bilan butun vujudimizda ajib entikish, dilimizda cheksiz iftixor tuygʼusini his etamiz. Chunki unda yurtimiz tarovati, buyuk kelajak barpo etish yoʼlida fidokorona mehnat qilayotgan xalqimizning orzu-intilishlari, Oʼzbekistonimizning jahon hamjamiyatida tobora yuksalib borayotgan obroʼ-eʼtibori, hech kimdan kam boʼlmay, kelajakka qatʼiy ishonch bilan intilayotgan yoshlarimizning azmu shijoati aks etgan.
Har tongni madhiyamiz sadolari bilan qarshi olamiz. Qalbimizda yangi kunga, istiqlolga va bugungi tinch-osoyishta hayotimizga shukronalik, kelajakka qatʼiy ishonch tuygʼusi joʼsh uradi.
Demak, istiqlolimizni, yurtimizning kuch-qudrati, xalqimizning aql-zakovati, ajdodlarimizning shon-shuhrati va avlodlarimizning yorugʼ kelajagini sharaflovchi bu tarona asrlar osha baralla yangrayveradi.
Shuningdek, tadbirda bank xodimlari orasida madhiyani yoddan yozib berish bo‘yicha tanlov o‘tkazilib, g‘oliblar esdalik sovg‘alar bilan taqdirlanishdi.
Ma’lumot uchun, madhiyamiz muallifi O‘zbekiston Qahramoni, xalq shoiri Abdulla Oripov bo'lib, musiqasini O‘zbekiston xalq artisti, atoqli bastakor Mutal Burhonov yaratgan.
1992-yil 10-dekabr «O‘zbekiston Respublikasining Davlat madhiyasi to‘g‘risida»gi O‘zbekiston Respublikasi Qonuni qabul qilingan kun.
Bank Axborot xizmati
Boshqa yangiliklar
