Bugun, 18 noyabr – Oʼzbekiston Respublikasining Davlat bayrogʼi qabul qilingan kun munosabati bilan “Mikrokreditbank” АTBda ham bank xodimlari ishtirokida madaniy-maʼrifiy tadbir boʼlib oʼtdi.
Maʼlumki, har bir mamlakatning suvereniteti va mustaqilligini ifodalovchi muqaddas timsollari boʼladi. Davlat ramzlari deb atalmish ushbu muqaddam timsollarga ega boʼlish uchun, uni dushman qoʼliga topshirmaslik maqsadida tarixda jangu jadallar boʼlgan. Davlat ramzlari azal-azaldan ajdodlar tomonidan muqaddas timsol sifatida hamisha koʼz qorachigʼiday asrab-avaylab kelingan.
Аna shunday ramzlardan biri mamlakatimizning davlat bayrogʼidir. Doimo oʼzbek xalqining shon-sharafi va gʼururidek yuksaklarda hilpirab turgan bayrogʼimiz 1991-yil 18-noyabrda Oʼzbekiston Respublikasi "Davlat bayrogʼi toʼgʼrisida”gi qonuni qabul qilingan kundan boshlab davlat suverenitetining ramziga aylandi va shu kundan boshlab, bayrogʼimiz Oʼzbekiston delegatsiyalarining xorijiy mamlakatlarga safarlari chogʼida, davlatimizning chet ellardagi elchixonalari va xalqaro tashkilotlardagi vakolatxonalarida, xalqaro konferensiyalarda, jahon koʼrgazmalarida, sport musobaqalarida, yurtimizdagi barcha rasmiy idoralarda ozod va obod Vatanimiz timsoli sifatida yuksaklarda parvoz qilmoqda.
Shayx Najmiddin Kubroning jasoratini tarixdan yaxshi bilamiz. Odatda, bayrogʼimiz qabul qilingan kun munosabati bilan oʼtkaziladigan katta-kichik tadbirlardagi maʼruzalarda, OAV va ijtimoiy tarmoqlardagi chiqishlarda buyuk bobomiz Najmiddin Kubro jasorati eslanadi.
Manbalarda aytilishicha, Najmiddin Kubro ogʼir yarador holida bosqinchilar bayrogʼini gʼanim yalovbardori qoʼlidan yulqib oladi. Bu aslida, dushman uchun ogʼir zarba edi. Bir muddat moʼgʼullar dovdirab qolishadi, chunki bayroqning tushirilishi magʼlubiyatdan darak edi. Yogʼiylar shayxning ustiga tashlanishib, bayroqni uning qoʼlidan tortib olmoqqa intiladilar, ammo bu ish oson kechmagani afsonaga aylanib ketganki, hozirda ham shu gaplar ogʼizdan-ogʼizga koʼchib yuradi...
Bu haqda tadbir ishtirokchilariga maʼlumotlar taqdim etilib, ular bilan bayrogʼimizning qadri va faxrimiz ekanligi toʼgʼrisida suhbatlashildi. Shuningdek, tadbir davomida bank xodimlari oʼrtasida tanlov oʼtkazildi. Tanlovda tadbir ishtirokchilari oʼzlariga ajratilgan “sanoqli predmetlar” (qogʼoz, ruchka va qalam) asosida davlat bayrogʼining rasmini chegaralangan vaqtda chizib berishlari kerak edi. Samimiy va xodimlar uchun kutilmagan tarzda oʼtgan tadbirda gʼoliblar ovoz berish orqali aniqlanib, bankning esdalik sovgʼalari bilan taqdirlanishdi.
Davlat ramzlari hamisha muqaddas va ulugʼ sanaladi. Chunki u xalqning oʼtmishi, buguni va kelajagini oʼzida mujassam etgan Vatanning yorqin timsolidir.
Bayrogʼimizning balandligi yurtimizning obroʼ-nufuzi yuksakligidan dalolatdir. Shunday ekan, sarbaland qaddimiz va qadrimiz timsolini hamisha eʼzozlaylik va boshimiz uzra baland koʼtaraylik!
Bank Аxborot xizmati
Yana ko‘ring
Arnasoyda aholi daromadini oshirishga qaratilgan loyihalar kengaytirilmoqda
MKBANK va Belarus elchisi — yangi hamkorlik imkoniyatlari sari
