MUROJAATLAR ORTIDA INSON MANFAATLARI BOR

Mikrokreditbank tizimida fuqarolar murojaatlari bilan ishlash alohida e’tibor qaratiladigan yo‘nalishlardan biri hisoblanadi. Bank tizimida mehnat foaliyatini olib borayotgan mutaxassislar har bir murojaat ortida inson taqdiri turganligini chuqur anglagan holda, ularda ko‘tarilgan masalalarni e’tibordan chetda qoldirmaslikka, o‘rganish ishlari natijalari bilan ularni fuqarolar foydasiga ijobiy hal qilishga harakat qilishmoqda.

Misol uchun 2026-yilning o‘tgan sakkiz oy mobaynida bankka yuqori instansiyalar orqali hamda toʻgʻridan-toʻgʻri jami 3 461 ta murojaat kelib tushgan bo‘lib, ularning 458 tasini (13,2 foizi) yuridik shaxslar, 3 003 tasini (86,8 foizi) jismoniy shaxslar hissasiga to‘g‘ri keldi.

Ushbu murojaatlarning 3 057 tasi belgilangan muddatidan oldin, 404 dan ortiq murojaat belgilangan muddatda koʻrib chiqildi.

Aholi va tadbirkorlar tomonidan yuborilayotgan murojaatlar sabablari oʻrganilib, har bir yoʻnalishlar boʻyicha qatʼiy choralar koʻrilishi hamda tahlil qilib borilishi natijasida oʻtgan yilning mos davriga nisbatan davlat dasturlari, ipoteka, taʼlim, mikroqarz ajratish (74 taga), tijorat krediti ajratish (60 taga), oilaviy tadbirkorlikni rivojlantirish dasturi doirasidagi murojaatlar esa (148 taga kamaydi.

Bank Boshqaruvining har oy yakuni boʻyicha qarorlarida bankning hududiy boʻlinmalariga murojaatlar bilan ishlashni samarali tashkil etish, murojaat tushgan kundan boshlab ijrosiga tezkor kirishish, bankka murojaat qilib kelgan fuqarolarning masalalarini joyida hal etish borasida zaruriy topshiriqlari o‘zining ijobiy samarasini bermoqda. Buni o‘tgan yilning mos davriga nisbatan Prezident virtual va Xalq qabulxonalariga yuborilgan murojaatlar soni kamaygani ham isbotlab turibdi.

Xususan, joriy yilning o‘tgan davri mobaynida respublika boʻyicha Prezident virtual va Xalq qabulxonalariga yuborilgan murojaatlar oʻtgan yilning mos davriga nisbatan 657 taga kamaygan.

Shu bilan birga sohada qilinadigan ishlarimiz talaygina. Tahlillar shuni ko‘rsatmoqdaki, hisobot davrida eng koʻp murojaatlar, Namangan, Surxondaryo, Qashqadaryo, Andijon, Toshkent viloyatlari hamda Toshkent shahri hududiy boshqarmalari hissasiga toʻgʻri kelgan.

Albatta, murojaatlar tushayotgan hududlar kesimida ma’lumotlar tahlil qilinib, masalaning kelib chiqish negizlari ham o‘rganib borilmoqda.

Ta’kidlash lozimki, bankka toʻgʻridan-toʻgʻri kelib tushgan murojaatlarni tahlil qilish, tizimli kamchiliklarni bartaraf etish bilan birga Davlat rahbarining tadbirkorlar bilan “Ochiq muloqot” oʻtkazish boʻyicha Respublika shtabiga kelib tushgan murojaatlarni tezkor koʻrib chiqish ishlariga ham e’tibor qaratildi.

Respublika shtabi orqali bankka kelib tushgan jami 111 ta murojaatning 36 tasi ijobiy hal etildi, 75 tasiga huquqiy tushunchalar berildi.

Respublika shtabiga kelib tushgan murojaatlarni oʻz vaqtida operativ koʻrib chiqish, murojaat kelib chiqishiga sabab boʻlayotgan omillar, tizimli kamchilik va muammolarni bartaraf etish va murojaatlarga tezkor javob berish maqsadida 7 ta tarkibiy boʻlinmalarga 50 ta tavsiya xatlari taqdim etildi.

Bundan tashqari, hududlarda aholi va tadbirkorlar ishtirokida 184 ta sayyor qabullar tashkil etilib, 1,5 mingga yaqin aholi va tadbirkorlarning murojaatlari ham koʻrib chiqildi. Mazkur sayyor qabullar davomida 1375 ta murojaat ijobiy hal etilib, shundan 1188 nafariga 37,5 mlrd. soʻm miqdorida kredit ajratilgan boʻlsa, 119 nafar murojaat mualliflariga huquqiy tushunchalar berildi.

Shuningdek, bank Boshqaruvi tomonidan hududlarda tadbirkorlar bilan 63 ta uchrashuv va ochiq muloqotlar tashkil etildi. Mazkur uchrashuvlarda tushgan 635 ta murojaatning 625 tasi ijobiy hal etildi.

Bir so‘z bilan aytganda, Mikrokreditbank tizimida aholi va tadbirkorlarning murojaatlari bilan ishlash tizimi yangi bosqichga chiqmoqda. Zero, har bir murojaat zamirida inson manfaati bor, uni ta’minlash esa har birimizning vazifamizga kiradi.

Obidjon Rahmatov,

“Mikrokreditbank” ATB Murojaatlar

bilan ishlash boshqarmasi boshlig‘i.