Berlin shahrida rasmiy tashrif bilan boʻlib turgan Oʻzbekiston delegatsiyasi Oʻzbekiston Respublikasining Germaniya Federativ Respublikasidagi Elchixonasi tashabbusi bilan tashkil etilgan “Ayollarning jamiyatdagi roli: Oʻzbekiston-Germaniya tadbirkor ayollari anjumani”da ishtirok etdi.
Anjumanda Oʻzbekiston Respublikasining Germaniyadagi Favqulodda va Muxtor Elchisi Dilshod Axatov, Oʻzbekiston Respublikasi Prezidenti Adminstratsiyasining Tashqi aloqalar departamenti Tashqi siyosat va tashqi iqtisodiy hamkorlikni kengaytirishni axborot-tahliliy taʼminlash boshqarmasi boshligʻi, Oʻzbekiston Savdo-sanoat palatasi qoshidagi tadbirkor ayollar Kengashi raisi Nozima Davletova, “Mikrokreditbank” ATB Boshqaruv raisi oʻrinbosari Shaxlo Ibragimova, “Hamroh” xotin-qizlar tadbirkorligini qoʻllab-quvvatlash kompaniyasi rahbari Dilfuza Nurmatova, Berlin federal oʻlkasi Ichki ishlar va sport senatori Iris Shpranger, “Sparkassenstiftung for International Cooperation” tashkilotining Yevropa va Markaziy Osiyo boʻyicha direktori Matias Fos, ikki mamlakatning faol tadbirkor ayollari hamda Germaniyada istiqomat qilayotgan vatandoshlar qatnashdi.
Anjumanda quyidagi mavzularda qizgʻin muhokamalar olib borildi:
• “Sparkassenstiftung for International Cooperation” tashkilotining Oʻzbekistondagi faoliyati va loyihalari;
• Oʻzbek xotin-qizlarining tadbirkorlik tashabbuslarini moliyaviy qoʻllab-quvvatlash;
• Ayollarga koʻmak va maslahat berish tizimlari;
• “SES” tashkilotining ayol tadbirkorlarni qoʻllab-quvvatlashdagi roli;
• Madaniyat va iqtisodiyot orqali ayollar faolligini oshirish;
• Ayol olimalarning xalqaro hamkorlikdagi ishtiroki;
• Oʻzbekistonlik hunarmandlar mahsulotlarini Germaniya bozoriga chiqarish yoʻllari.
Anjumanda soʻz olgan Shaxlo Ibragimova, Oʻzbekistonda xotin-qizlarning iqtisodiy faolligini oshirish, tadbirkorlikka jalb etish va biznes tashabbuslarini moliyaviy qoʻllab-quvvatlashga alohida eʼtibor qaratilayotganini taʼkidladi:
— Prezidentimizning topshiriqlariga muvofiq, tijorat banklari, jumladan, Mikrokreditbank tomonidan xotin-qizlar biznes loyihalarini qoʻllab-quvvatlash yoʻnalishida bir qator muhim ishlar amalga oshirilmoqda. Joriy 2025-yilda “Oilaviy tadbirkorlikni rivojlantirish”, “Kichik biznesni qoʻllab-quvvatlash”, “Hamroh” dasturlari, “Biznesga birinchi qadam”, “Mahalla-biznes” va “Mening mahallam” kabi kreditlar orqali ayollar biznesi uchun 1 trillion 73 milliard soʻmlik imtiyozli kreditlar ajratildi. Bu orqali 48 mingdan ziyod ayollar tadbirkorlikka jalb qilindi. Yil yakuniga qadar esa yana 1 trillion soʻmdan ortiq imtiyozli kredit ajratish rejalashtirilgan.
Anjumanda Mikrokreditbank mijozi boʻlgan tadbirkor ayollarning chiqishlari alohida eʼtirof etildi.
“Voris kashtachilari” MCHJ rahbari Shaxnoza Sharipova Mikrokreditbank koʻmagida erishgan yutuqlari haqida soʻz yuritar ekan, milliy hunarmandchilik sohasini rivojlantirishdagi imkoniyatlar bilan qatnashchilarni ilhomlantirdi. Samarqandlik tadbirkor Umida Baxriddinova esa germaniyaliklarni oʻzining shinam mehmonxonasiga taklif etib, mintaqaviy turizm salohiyatini namoyon etdi.
Anjumanda ikki mamlakat tadbirkor ayollari oʻrtasida oʻzaro hamkorlikni yangi bosqichga olib chiqish, tajriba almashish va yangi qoʻshma loyihalarni amalga oshirish borasida kelishuvlarga erishildi.
Tadbir yakunida Mikrokreditbank, “Sparkassenstiftung for International Cooperation” hamda “Hamroh” kompaniyasi oʻrtasida hamkorlik memorandumi imzolandi.
Shuningdek, ikki davlat tadbirkorlarining oʻzaro sayohatlarini tashkil etish, onlayn forumlar va mahsulotlar almashinuvi kabi qoʻshma dasturlarni amalga oshirishga kelishib olindi.
Oʻzbekiston delegatsiyasining Berlindagi rasmiy tashrifi davom etmoqda.
Bank Axborot xizmati
Yana ko‘ring
Moliyaviy savodxonlik: Bankomatlar tarixi haqida nimalarni bilamiz?
Ushbu oʻquv treninglar bepul va muntazam tashkil etilayotgan bo‘lib, mahalla aholisining moliyaviy savodxonligini oshirishga qaratilgandir.
Metro va avtobusda yanada qulay to‘lov!
Infografika: Korrupsiyon holatlar bo‘yicha
Aloqa kanallariga 168 ta murojaatlar kelib tushgan
