Poytaxtimizdagi mahallalarda kutubxonalar tashkil etilmoqda

Taniqli adabiyotshunos O‘zbekiston qahramoni Ozod Sharafiddinov farzandlarinig tarbiyasidan nolib maslahat so’rab kelgan kishiga: “Farzandlaringizning qo‘liga kitob tutqazing. Kitob ularga hayotni, turmushning qiyinchilklariga dosh berishni, sabrni va qanoatni o‘rgatadi” degan ekanlar. 

Darhaqiqat, inson ma’naviyatini oshiradigan, so‘z boyligini to‘ldirib boradigan eng muhimi, to‘g‘ri yo‘lni ko‘rsatadigan eng yaqin do‘st bu kitobdir.

Davlatimiz rahbari “Kitobsiz taraqqiyotga, yuksak maʼnaviyatga erishib boʻlmaydi. Dunyodagi har qaysi davlat, har qaysi millat birinchi navbatda oʻzining intellektual salohiyati, yuksak maʼnaviyati bilan qudratlidir. Bunday yengilmas kuch manbai esa, avvalo, insoniyat tafakkurining buyuk kashfiyoti – kitob va kutubxonalarda, – deb bejiz taʼkidlamaganlar.

Bugun “Mikrokreditbank” ATB tashabbusi bilan poytaxtimizdagi qator mahallalarda shinam va ko‘rkam kutubxonalar tashkil etilib, foydalanishga topshirilmoqda. Ulardan biri poytaxtimizdagi Yangi hayot tumani “Olchazor” mahallasida yangi tashkil etilgan kutubxonadir. 

Ushbu ziyo maskanida o‘zbek va jahon adabiyotining nodir asarlari, iqtisodiy kitoblar, bolalar adabiyoti hamda turli janrlarda chop etilgan adabiyotlar, ma’naviy-ma’rifiy va tarbiyaviy ahamiyatga ega jami 2 mingga yaqin kitoblar o‘rin olgan bo‘lib, bu ma’naviyat maskani mahalla ahli uchun kutilmagan sovg‘a bo‘ldi. Shuningdek, kutubxonada shaxmat o‘ynashga qiziquvchilar uchun ham alohida joy hozirlangan.

Mazkur kutubxonaning ochilishi yosh-u keksaga chinakam quvonch bag‘ishlaydi, desak adashmaymiz. Chunki endi nafaqat yoshlar, balki keksa avlod ham bo‘sh vaqtini ana shu ziyo maskanida o‘tkazishi mumkin.

2024-yil 1-mart holatiga ko‘ra, “Olchazor” mahallasida 5287 nafar aholi, shu jumladan, 2 544 nafar yoshlar, 2 541 nafar xotin-qizlar istiqomat qiladi. 

Yana bir kutubxona Olmazor tumanidagi “Xonchorbog‘” mahallasida ham eng yangi kitoblar bilan boyitilgan holda tashkil etildi.

Bu yerdagi kutubxonada ham mahalladagi turli soha va qatlam vakillari o‘zlari uchun zarur kitoblarni topishlari, shuningdek, shaxmatga qiziquvchilar shaxmot o‘ynashlari mumkin. Yoshlar va keksalarni bir manzilga to‘playdigan shinam go‘shada ayni damda 1,5 mingdan ortiq badiiy va tarjima adabiyotlar, ertak kitoblar, turli ensiklopediya va yurtimiz tarixiga oid kitoblar mavjud.

Mikrokreditbankka biriktirilgan yana bir hudud - Chilonzor tumanidagi 5000 dan ortiq aholi yashaydigan “Sharq” mahallasi bo‘lib, u yerda ham zamonaviy va shinam kutubxona tashkil etildi. Mingdan ortiq badiiy va tarjima adabiyotlar, iqtisodiy va motivatsion kitoblar, bolalar adabiyoti va yurtimiz tarixiga oid kitoblar mahalla ahli uchun ajoyib tuhfa bo‘ldi. Bu mahallada ham shaxmatga qiziquvchilar uchun shaxmot o‘ynashlariga sharoit yaratildi.

Ayniqsa, ushbu mahallada istiqomat qiluvchi, kitobga o‘zgacha mehr qo‘ygan Dilnoza Aliyeva ancha vaqtdan buyon ishsiz bo‘lib, bugun bu kutubxonaning ochilganidan juda xursandligini va sevimli ishi bilan shug‘ullanishidan mamnunligini yashirmadi.  

E’tiborlisi shundaki, mahallalardagi bu kabi ko‘rkam kutubxonalarning tashkil etilishi nafaqat aholi o‘rtasida kitobxonlik madaniyatini oshirishga, balki shu hududda yangi ish o‘rinlari yaratilishiga xizmat qiladi. 

Mikrokreditbank esa bunday xayrli ishlarda doim xalqimizga kamarbasta bo‘lishga intiladi.

Bank Axborot xizmati