Joriy yilning 27-sentabr kuni “Mikrokreditbank” ATB Boshqaruv raisi oʻrinbosari Shaxlo Ibragimova, Ijtimoiy dasturlarni amalga oshirish departamenti vakillari hamda “Mikrokreditbank” ATB Sirdaryo viloyat hududiy boshqarmasi boshqaruvchisi Ilhom Iskanovlar Sirdaryo viloyatining Sardoba tumaniga tashrif buyurdi. Tadbirda shuningdek, Sardoba tuman hokimligi, tuman faollari va xotin-qizlar ishtirok etishdi.
Tashrifdan koʻzlangan maqsad, sardobalik xotin-qizlar bandligini taʼminlash, ularni tadbirkorlik faoliyatiga keng jalb etish, taklif va tashabbuslarini oʻrganish, shu bilan birga tadbirkor ayollar faoliyati bilan tanishishdan iborat.
Tashrif avvalida xotin-qizlar bandligini taʼminlash, ularni tadbirkorlikka jalb etish, muammo va murojaatlarini oʻrganish maqsadida tuman xotin-qizlari bilan uchrashuv tashkil etildi. Uchrashuv davomida xotin-qizlar tadbirkorligini qoʻllab-quvvatlash maqsadida joriy etilgan yangi mahsulotlar, imtiyozli kreditlar va ulardan foydalanish tartibi boʻyicha maʼlumotlar berildi.
Tadbir davomida “Mikrokreditbank” ATBning moliyaviy koʻmagida oʻz tadbirkorlik faoliyatini yoʻlga qoʻygan xotin-qizlar tomonidan ishlab chiqarilayotgan mahsulotlar koʻrgazmasi ham tashkil etildi.
Masalan, tumanning Navroʻz mahallasida istiqomat qiluvchi Munira Dulonova asalarichilik faoliyati bilan shugʻullanadi. Buning uchun bank tomonidan dastlab 33 mln. soʻm miqdorda imtiyozli kredit ajratilgan edi. Kreditlarni oʻz vaqtida soʻndirib, yana 30 mln. soʻm miqdordagi imtiyozli kreditdan foydalangan holda faoliyatini yanada kengaytirdi. Munira opa xonadonida bugungi kunda 50 ta asalari oilasi parvarishlanmoqda. Koʻrgazmada oʻz mahsulotlarini namoyish etar ekan, u bugungi kunda xotin-qizlarga berilayotgan imkoniyat va imtiyozlar natijasida yuqori daromadga ega boʻlayotganini va tez orada maxsus brend ostida mahsulotlarini ichki bozorga chiqarishini bildirdi.
Yana shu kuni tumanda tashkil etilgan Monomarkazdagi xotin-qizlarni kasb-hunarga va tadbirkorlik koʻnikmalariga oʻqitish borasidagi ishlar ham koʻzdan kechirildi.
O‘qishni tugatayotgan yoshlarga mustaqil ravishda faoliyat boshlashi uchun takliflar berildi. Taʼkidlash lozimki, bugungi kunda xotin-qizlar bandligini taʼminlash boʻyicha amaliy ishlarning salmogʻi Sardoba tumanida sezilarli darajada ortdi. Dastur asosida xotin-qizlarni kasbga oʻqitish va bandligini taʼminlash, ularni tadbirkorlikka keng jalb etish boʻyicha ishlarni mutlaqo yangicha yondashuvlar va tizim asosida tashkil etilishi boʻyicha mahallalar kesimida manzilli rejalar belgilab olindi. Natijada esa bugungi kunda Sardoba tumanidagi 900 nafarga yaqin xotin-qizlar kasb-hunar, tadbirkorlik koʻnikmalari va moliyaviy savodxonlikka oʻqitildi. Yil yakuniga qadar yana 600 nafarga yaqin xotin-qizlarni tumandagi Monomarkazda oʻqitish rejalashtirilgan.
“Mikrokreditbank” ATB tomonidan Oʻzbekiston Respublikasi Prezidentining 2024-yil 7-martdagi "Xotin-qizlar tadbirkorligini yoʻlga qoʻyish va rivojlantirishni qoʻllab-quvvatlashga oid qoʻshimcha chora-tadbirlar toʻgʻrisida"gi qarorining ijrosini taʼminlash maqsadiga qaratilgan amaliy ishlar davom etadi.
Bank Axborot xizmati
Boshqa yangiliklar
MKBANKda yutuqli aksiya!
