PRESS-RELIZ
Joriy yilning 20-sentabr kuni Milliy matbuot markazida Mikrokreditbank aksiyadorlik-tijorat banki tomonidan 2024-yilning oʻtgan davrida amalga oshirilgan ishlar va erishilgan natijalarga bagʻishlangan matbuot anjumani boʻlib oʻtdi. Unda Boshqaruv raisi oʻrinbosari Shahlo Ibragimova va tegishli masʼullar ishtirok etdi.
Matbuot anjumanida bankning 2025-yilgacha rivojlantirish strategiyasi boʻyicha ishlab chiqilgan “Yoʻl xaritasi”da belgilangan chora-tadbirlar ijrosining taʼminlanishi natijasida 2024-yilning 8 oyida erishilgan natijalar haqida soʻz bordi.
Jumladan, bank kapitali qariyb 4 trln. soʻmga; umumiy aktivlar 21 foizga oshib, 23 trln. soʻmga; kredit portfeli 13 foizga oshib, 16,3 trln. soʻmga; bankdagi umumiy depozitlar qoldigʻi 8 foizga ortib, 6,9 trln.soʻmga yetdi.
Jalb qilingan resurslar hamda barcha moliyalashtirish manbalari hisobidan joriy yilning oʻtgan 8 oyida 133 578 nafar aholi va tadbirkorlik subyektlariga 5 trln. soʻm kredit ajratilib, qariyb 206 ming nafar aholi bandligi taʼminlandi.
Oilaviy tadbirkorlikni rivojlantirish dasturi doirasida hisobot davrida aholi va tadbirkorlarga jami 1 508 mlrd. soʻmdan ortiq kreditlar (yillik reja 2,4 trln.soʻm) ajratilishi natijasida 90 101 nafar aholi bandligi taʼminlandi. Shu bilan birga, ushbu kreditlarning 575,5 mlrd. soʻmi 33 176 nafar yoshlar hamda 772,5 mlrd. soʻmi 51 735 nafar xotin-qizlarning loyihalariga yoʻnaltirilgan.
Oilaviy tadbirkorlik yoʻnalishida imtiyozli kredit mablagʻiga ehtiyoji bor aholi ortiqcha vaqt sarflamasdan bankning “Mavrid” ilovasi orqali kreditga ariza yuborish imkoni yaratildi. Buning uchun bankning “Mavrid” ilovasi hamda oilakredit.uz platformasini integratsiya qilish jarayonlari yakuniga yetkazildi.
Mamlakatimizda kambagʻallikni qisqartirish, aholi bandligini va doimiy daromad manbaini taʼminlaydigan ish oʻrinlarini yaratish maqsadida 4 ta tajriba - Sayhunobod, Uychi, Zarbdor va Gʻijduvon tajribasi yaratildi va shu asosda butun mamlakatda, har bir tuman, har bir mahallada ishlar tashkil qilinmoqda.
“Sayxunobod tajribasi” boʻyicha bankka biriktirilgan 1 230 ta mahallalardagi 7 767 ta xonadonlarga jami 136,5 mlrd soʻmlik loyiha paketlari yetkazib berilishi natijasida 15 844 nafar aholining bandligi taʼminlandi.
“Uychi tajribasi” asosida Rahbariyat tomonidan bank mijozlari, tadbirkorlar ishtirokida jami 337 marotaba uchrashuvlar oʻtkazilib, tadbirkorlarning 5 516 ta murojaatlari ijobiy hal etilishi natijasida 61 987 ta ish oʻrni yaratildi. Ushbu tajribani qoʻllagan holda 903 mlrd soʻm kredit hisobiga 29 049 ta mikroloyihalar amalga oshirildi. Buning natijasida 52 140 nafar yangi ish oʻrni yaratildi
"Gʻijduvon tajribasi” asosida Mikrokreditbank tomonidan Gʻijduvon tumani “Gulistonobod” MFYdagi “Ortiq Dilnavoz” MCHJga 150 oʻrinli tikuv sexi qurib berilib, tutash mahallalardagi 150 nafar ishsiz xotin-qizlar bandligi taʼminlandi. Bu kabi ishlab chiqarish bino-inshootlari tumanning yana 20 ta mahallalarida qurilib, mahalliy tadbirkorlarga 20 yilga boʻlib toʻlash sharti bilan ajratiladi. Natijada, tumanning 3 mingdan ziyod aholisi ish bilan band qilinadi.
“Zarbdor tajribasi” asosida bankka biriktirilgan Xiva shahrining “Garvuk koʻl” massivida zamonaviy turizm majmuasi tashkil qilinmoqda.
“Mikrokreditbank” ATB tomonidan yana bir muhim yoʻnalish, yoshlarning taʼlim olishiga, oliy oʻquv yurtlari talabalarini moliyaviy qoʻllab-quvvatlashga alohida eʼtibor qaratilmoqda. Misol uchun, 2024-yilning oʻtgan davrida 13 589 nafar talabaga jami 113,5 mlrd. soʻm miqdorida taʼlim kreditlari ajratildi. Eʼtiborlisi, ushbu mablagʻning asosiy qismi, yaʼni 88,8 mlrd. soʻmi aynan 10 976 nafar xotin-qizlarning tahsil olishi uchun foizsiz kreditlar ajratildi.
Aholining uy-joyga boʻlgan talabini qondirish maqsadida 3-chorakda 272 nafar mijozga jami 82,7 mlrd. soʻm miqdorida ipoteka kreditlari ajratib berildi.
Bank transformatsiyasi jarayonlari natijasida 2024-yilda xizmat nuqtalari soni 574 taga, xizmat turlari soni 102 taga, bankomatlar soni 826 taga yetkazilib, 24/7 shoxobchalar soni 437 taga yetdi, bankimiz tomonidan oʻtgan davrda 2,38 mln.dan ortiq mijozga xizmat koʻrsatildi.
Bankda amalga oshirilgan raqamlashtirish hamda transformatsiya chora-tadbirlarida inson omilisiz koʻrsatiladigan bank xizmatlaridan onlayn foydalanuvchi jismoniy shaxslar ulushi 60 foizga, tadbirkorlar ulushi 77 foizga oshdi.
Mikrokreditbank kelgusida ham aholiga va tadbirkorlik subyektlariga zamonaviy, sifatli bank xizmatlarini doimiy ravishda koʻrsatilishini taʼminlaydi.
Bank Axborot xizmati
