Yaqinda “Kun.uz” saytida eʼlon qilingan maqolada “Mikrokreditbank” Bulungʼur tuman filiali xodimlarining davlatdan ajratilgan imtiyozli mablagʼlarni talon-taroj qilganligi ehtimoli yoritilgan. Jumladan, maqolada ushbu filial rahbar va xodimlari oʼz lavozim majburiyatlarini suisteʼmol qilgani toʼgʼrisida maʼlumotlar berilgan.
Ushbu holat Samarqand viloyati Markaziy banki hamda “Mikrokreditbank”ning tegishli mutaxassislari tomonidan oʼrganib chiqildi.
Unda aniqlanishicha, bankdan shikoyat qilgan mijoz Mirjalol Xursanov oʼziga tegishli “Mirjalol Xursanov Textel” oilaviy korxonasiga tikuv mashinalari sotib olish uchun, 6 oy imtiyozli davr bilan 36 oy muddatga, yillik 14 foiz ustama toʼlash sharti bilan, 60 mln soʼm miqdorida kredit ajratilgan. Biroq, bank tomonidan kredit ajratilgandan keyin, taʼminotchi tomonidan mahsulotlar kechikib kelgani bois, fuqaro M.Xursanov jahl ustida bank xodimlari ustidan tuxmat qilganligini taʼkidladi.
Buni tasvirga olingan videoda ham toʼliq koʼrish mumkin.
Jumladan, bank rahbari Z.Shakarovga kredit ajratish uchun bergan 200 АQSh dollar “shapka puli”ni aslida bermaganini, “Kun.uz” surishtiruvida sohtaligi taʼkidlangan tikuv mashinalari ham “Mirjalol Xursanov Textel” OKga tegishli ekanini bildirgan. Аyni paytda mijoz M.Xursanov “Mikrokreditbank”dan hech qanday shikoyati yoʼqligini taʼkidlamoqda.
Аyni paytda yuqoridagi holatga huquqiy baho berish uchun Bulungʼur tuman prokraturasi tomonidan surishtiruv harakatlari olib borilmoqda.
