Bugun ishlab chiqarish va tadbirkorlik sohasida amalga oshirilayotgan ishlar haqida gap ketar ekan, har bir hududda qad koʼtarayotgan zamonaviy ishlab chiqarish komplekslari koʼz oldimizga keladi. Chunki bu yerda aholining bandligini taʼminlash bilan birga yurtimizda eskport va import mahsulotlarga boʼlgan talabning ham oʼrni oshmoqda.
Аna shunday yirik loyihalar qatorida Fargʼona viloyati Uchkoʼprik tumani “Boboshbek” MFYda qurilayotgan “Yengil sanoat mahsulotlari ishlab chiqarish va logistika markazi”ni misol qilib keltirish mumkin. Ushbu keng tarmoqli markaz nafaqat Fargʼona viloyatining, balki yurtimiz va qoʼshni davlatlar aholisining kundalik talabini ham bemalol qondirish imkoniga ega, desak adashmaymiz.
15 gektar maydonni egallagan ushbu koʼp tarmoqli markazning 9,2 gektarida ishlab chiqarish va 3,8 gektarida savdo komplekslari tashkil etilishi rejalashtirilgan boʼlib, 336 ta savdo doʼkonlari, 358 ta ishlab chikarish sexlari, 3 ta (kichik, oʼrta, yirik) blokli ishlab chiqarish sexlari va 560 ta kichik savdo rastalari joy oladi. Shuningdek, hududda 2 gektar maydonda logistika markazi, qoʼshimcha maishiy xizmat koʼrsatish obyektlari loyiha tashabbuskorlari tomonidan amalga oshirilishi ham koʼzda tutilgan.
Loyihaning umumiy qiymati 218 milliard soʼm boʼlib, ushbu mablagʼ АTB “Mikrokreditbank” Uchkoʼprik tumani filiali tomonidan ajratilgan.
2022-yilning ikkinchi choragida ishga tushishi rejalashtirilayotgan “Yengil sanoat mahsulotlari ishlab chiqarish va logistika markazi” yiliga 3,2 mln. dollarlik mahsulotlarni MDH davlatlariga eksportga chiqarish imkoniga ega.
Salkam 8000 ta ish oʼrnini yaratishni maqsad qilgan ushbu loyihada bugun qurilish ishlari avjida boʼlib, ayni damda MDH davlatlari bilan hamkorlik va tovar eksporti borasida ham shartnomalar ustida ishlar olib borilmoqda.
Ushbu hududda o'z biznesini yo'lga qo'ymoqchi bo'lgan tadbirkorlik subyektlarini foydali hamkorlikka chorlaymiz.
Bank Axborot xizmati
