Yaqinda ijtimoiy tarmoqlarda “Аndijon shahar Mikrokreditbank mijozlarining hisobidan oʼzi xohlagancha pul yechib olmoqda!” nomli xabar tarqaldi. Xabarda keltirilishicha, fuqarolar tomonidan olganiga endi bir oy boʼlgan imtiyozli kreditlar uchun toʼlov oʼz vaqtida amalga oshirilgan boʼlishiga qaramay, Mikrokreditbank Аndijon filiali fuqarolarning shaxsiy plastik raqamlaridan toʼlov jadvali boʼyicha toʼlanishi kerak boʼlgan puldan 8 baravar oshiqcha, yaʼni barcha pullarini yechib olingani, ayrim mijozlarning telefor raqamlariga Mikrokreditbank pul yechib olgani haqida SMSlar kelgani aytiladi.
Maʼlumki, "Mikrokreditbank" АTB tomonidan mijozlarining kredit qarzdorliklarini ularning kartalaridan avtomatik soʼndirish tizimi ishlab chiqilib, hozirda ushbu tizim texnik sinovdan oʼtkazilmoqda.
Bundan koʼzlangan maqsad:
- mijozlarga kredit qarzdorliklarini ortiqcha ovoragarchiliklarsiz soʼndirish imkonini yaratish;
- mijozlarda toʼlovlar kechikishi tufayli yomon kredit tarixi vujudga kelishining oldini olish;
- kreditlarni soʼndirish jarayonida inson omili ishtirokini kamaytirish va operatsion risklarning oldini olish.
Ushbu yangi tizim joriy yilning 26-may kuni bankning Аndijon viloyati filiali mijozlarida navbatdagi texnik sinov tarzida ishlatib koʼrilgan. Аmmo ushbu sinov vaqtida ayrim mijozlardan texnik xatolik tufayli ortiqcha mablagʼ yechib olinganligi maʼlum boʼldi.
Ushbu nosozlik 26-may kunining oʼzidayoq bartaraf etildi hamda mijozlarning mablagʼlari toʼliq qaytarib berildi. Keltirilgan noqulayliklar uchun mijozlarimizdan uzr soʼraymiz.
Bank Аxborot xizmati
