Xabaringiz bor, Oʼzbekiston Respublikasi Prezidentining 2022-yil 24-yanvardagi “Parrandachilik tarmogʼini davlat tomonidan qoʼllab-quvvatlashga doir qoʼshimcha chora-tadbirlar toʼgʼrisida”gi PQ-100-sonli qarori hamda 2022-yil 15-iyundagi “Parrandachilik sohasini davlat tomonidan qoʼllab-quvvatlash tizimini yanada takomillashtirish chora-tadbirlari toʼgʼrisida”gi PQ-281-sonli qarorlari qabul qilindi. Unga asosan, parrandachilik mahsulotlarini ishlab chiqarish bilan shugʼullanuvchi tadbirkorlarni davlat tomonidan qoʼllab-quvvatlash, subsidiyalar ajratish va boshqa imtiyozlardan foydalanish huquqi ijrosiga eʼtibor qaratilgan. Qarorda qayd etilishicha, 2022 yil 1 iyundan 400 mlrd. soʼmgacha kredit mablagʼlari hisobidan parrandachilik xoʼjaliklari va parranda omuxta yemi ishlab chiqaruvchi tadbirkorlarga don zaxirasi yaratish uchun Markaziy bank asosiy stavkasida 3 oylik imtiyozli davr bilan 12 oy muddatgacha revolver kreditlar ajratiladi.
Bugun respublikamizda oziq-ovqat xavfsizligini taʼminlash, shuningdek, parrandachilikni rivojlantirish va tarmoq ozuqa bazasini yanada mustahkamlash hamda parrandachilik yoʼnalishidagi tadbirkorlik subʼektlarini qoʼllab-quvvatlash maqsadida “Mikrokreditbank” АTBga 85 million АQSH dollar miqdoridagi mablagʼ ajratish belgilangan. Hozirga qadar (birinchi bosqichda) 50 million АQSH dollari miqdoridagi mablagʼlar yoʼnaltirilgan.
Shuningdek, “Mikrokreditbank” АTB tomonidan oʼtgan davr mobaynida 200 dan ortiq parrandachilik xoʼjaliklari va ozuqa-em mahsulotlarini ishlab chiqaruvchi korxonalarga 491,3 mlrd. soʼm miqdorida kreditlar ajratildi.
Joriy yilning 22-iyunida “Mikrokreditbank” АTB, “Parrandasanoat” uyushmasi hamda Jurnalistlar ijodiy uyushmasi Buxoro viloyat boʼlimi bilan hamkorlikda Buxoro viloyati Romitan tumanidagi “Behtarin Group” MCHJda bir guruh ommaviy axborot vositalari vakillari ishtirokida press-tur tashkil etildi.
Press-tur davomida OАV vakillari “Behtarin Group” MCHJ faoliyati bilan bevosita yaqindan tanishish imkoniga ega boʼlishdi.
“Behtarin Group” MCHJ haqida maʼlumot
“Behtarin Group” MCHJ faoliyati goʼsht yoʼnalishidagi parrandachilikka moʼljallangan boʼlib, “Mikrokreditbank” АTB tomonidan 2021-yilda 2 yil muddatga 6 oylik imtiyozli davr bilan 3,3 mlrd.soʼm miqdorida kredit ajratilgan.
“Behtarin Group” MCHJ bugungi kunda toʼliq ishga tushgan boʼlib, hozirda korxonada 30 ga yaqin yangi ish oʼrinlari yaratilgan. Kelgusida korxonani kengaytirish hisobiga ishchilar sonini 40 nafardan oshirish rejalashtirilgan.
Hozirda korxonada 1 oyda oʼrtacha 75 ming bosh joʼja boqilyapti, mahsulot asosan, ichki bozorni taʼminlashga moʼljallangan. Shuningdek, yaqin oylarda korxona kengaytirilib, yil oxirigacha 90 ming bosh joʼja boqilishi natijasida oʼrtacha 180 ming tonna goʼsht holida ichki bozorga chiqariladi.
Mazkur korxona 2023-yilda oʼz faoliyatini kengaytirib, 3 ta sex qurishni, u yerda parranda uchun asosiy ozuqa boʼlgan yem ishlab chiqarishni va boqilgan joʼjalarni soʼyish liniyasini ham tashkil etishni maqsad qilgan.
Xulosa oʼrnida aytish mumkinki, bugun “Mikrokreditbank” АTB tadbirkorlarni qoʼllab-quvvatlash yoʼlida doim ular bilan birga.
Bank Аxborot xizmati
