“Mikrokreditbank” АTB tadbirkorlarning muammo va murojaatlarini o‘rganmoqda

Xabaringiz bor, o‘tgan yildan buyon davlatimiz rahbari yurtimizda tadbirkorlik bilan shug‘ullanayotgan ishbilarmonlar bilan uchrashib, ular bilan har yili ochiq muloqot qilishni taklif etgandi. Bu yil ham ana shu anʼanani davom ettirish maqsadida Shavkat Mirziyoyevning tadbirkorlar bilan uchrashuv o‘tkazishi rejalashtirilgan.

Mazkur ochiq muloqotga ayni damda tayyorgarlik jarayonlari avjida bo‘lib, har bir tashkilot hamda muassasalar o‘z vazifasidan kelib chiqib, tadbirkor va ishbilarmonlar tomonidan bildirilayotgan murojaatlarni o‘rganib, ularga tegishlicha yordam ko‘rsatishmoqda.

Аyni paytda ularning muammolarini oʼrganish uchun 80dan ziyod tashkilot vakillari maxsus shtabda murojaatlar bilan ishlamoqda.

Shu maqsadda “Mikrokreditbank” АTB tomonidan ham tadbirkorlarning muammo va murojaatlari o‘rganilib, ularning ijobiy hal etilishi taʼminlanmoqda.

“Ochiq muloqot” bo‘yicha respublika shtabi “Call markazlari”ga 2022-yil 17-avgust holatiga ko‘ra “Mikrokreditbank” АTBga tegishli 153 ta murojaatlar kelib tushgan bo‘lib, ushbu murojaatlarning barchasi qonun talablariga asosan o‘rganib chiqildi.

Shundan 40 tasi (21 tasiga kredit ajratildi, 11 tasining kredit muddati uzaytirildi, 8 tasi boshqa masalalar) ijobiy hal qilindi (26 foiz), 113 tasiga huquqiy tushuncha berildi.

Eslatib o‘tamiz, Prezident Shavkat Mirziyoyevning tadbirkorlar bilan ochiq muloqoti 22-avgust kuni bo‘lib o‘tishi mo‘ljallangan.

Bank axborot xizmati