“Bir kontur – bir mahsulot” tamoyili: Buxoroda brokkoli karami yetishtirish yoʻlga qoʻyildi

Romitan tumanidagi “Azizon” MFY hududida tashkil etilgan  “Bir kontur -  bir mahsulot” tamoyili asosida aholiga auksion orqali uzoq muddatli ijraga sotilgan 15,4 gektar yer maydonida eksportbop brokkoli yetishtirilmoqda. 

Shu oʻrinda  “Bir kontur – bir mahsulot” tamoyili haqida qisqacha maʼlumot berib oʻtsak. Mazkur tamoyil asosida hududlarda tuproq iqlim sharoiti, fuqarolarning dehqonchilik madaniyati, mahsulot sotib oluvchi klaster, kooperatsiyalar, qayta ishlash va eksportyor korxonalarning mahsulot turiga boʻlgan talabi hamda ichki isteʼmol bozorlarida aholining asosiy turdagi oziq-ovqat mahsulotlariga boʻlgan ehtiyojidan kelib chiqib, qishloq xoʻjaligi ekinlari joylashtiriladi.

Oʻzbekiston Respublikasi Vazirlar Mahkamasining “Aholiga dehqon xoʻjaligini tashkil etish uchun ijara huquqi asosida ajratilayotgan yer maydonlaridan foydalanish samaradorligini oshirish chora-tadbirlari toʻgʻrisida”gi qarorida bu borada aniq vazifalar belgilab berilgan. 
Qaror ijrosini taʼminlash maqsadida “Mikrokreditbank” ATB tomonidan tanlab olingan mazkur loyihaga, aholiga eksportbop mahsulotlarni yetishtirish va kafolatli sotishga koʻmaklashish maqsadida eksportyor “Buxoro Export Trade” MCHJ agregator etib belgilandi.

Shuningdek, Surxondaryo viloyatidan Maʼruf Xidirov agronom sifatida jalb qilindi. Ijara huquqi asosida 69 nafar fuqaroning 31 nafariga 30 sotixdan va 38 nafariga 16 sotixdan yer maydoni biriktirib berilgan boʻlib, loyihaning umumiy qiymati 5 mlrd soʻmni tashkil etadi. 

Tamoyil asosida birinchi ekinda brokkoli karami yetishtirilsa, ikkinchi ekinda baqlajon yetishtiriladi. Bunda 1 gektar maydondan brokkoli mahsulotidan olinadigan daromad 200 mln. soʻmni,  ikkinchi ekinda baqlajondan olinadigan daromad 360 mln. soʻmni tashkil etadi. Umumiy qiymatda birinchi ekindan olinadigan foyda 1,7 mlrd soʻm, ikkinchi ekinda 4,4 mlrd soʻm boʻladi. 
Prognozga koʻra 1 kg brokkolini 10 ming soʻm, 1 kg baqlajonni 4 ming soʻm qiymatida sotish rejalashtirilgan boʻlib, birinchi ekindan 309 tonna, ikkinchi ekindan 1389 tonna hosil olish koʻzda tutilgan. 

Yetishtirilgan hosil “Buxoro Eksport Trade” MCHJ tomonidan aholi bilan tuzilgan fyuchers shartnomasiga asosan kafolatli sotib olinib, eksportga yoʻnaltiriladi. Hisob-kitoblarga koʻra, bir yer egasining ushbu mahsulot yetishtirish orqali oladigan sof foydasi 1 yilda brokkoli mahsuloti yetishtirish orqali 60 mln.soʻmni, baqlajon mahsluoti orqali 85 mln.soʻmni tashkil etadi. 
“Mikrokreditbank” ATB tomonidan “Bir kontur – bir mahsulot” tamoyili asosidagi loyihalarni amalga oshirish davom etadi.