Oʻzbekiston Respublikasi Prezidentining 2024-yil 8-aprelda qabul qilingan “Faktoring xizmatlari bozorini jadal rivojlantirish chora-tadbirlari toʻgʻrisida”gi Farmoni ijrosini taʼminlash, shuningdek, kichik va oʻrta biznes subyektlari faoliyatining uzluksizligini qoʻllab-quvvatlash maqsadida Mikrokreditbank tizimida ham qator yangiliklar joriy etildi.
Jumladan, kichik va oʻrta biznes subyektlari uchun “Faktoring xizmat koʻrsatish moduli” ishlab chiqildi. Mazkur modul 6 oygacha boʻlgan muddatda, xizmat muddatiga qarab 2 foizdan 12 foizgacha diskont stavkasi bilan faktoring xizmatlarini koʻrsatish imkonini beradi.
Bundan tashqari, eksport va import operatsiyalari uchun chet el valyutasida faktoring xizmatlari moduli joriy qilindi. Ushbu xizmat turi kichik va oʻrta biznes subyektlariga 6 oygacha boʻlgan muddatda, AQSH dollari va Yevroda muddatiga qarab 1,3 foizdan 7,8 foizgacha diskont stavkada moliyaviy qoʻllab-quvvatlash imkoniyatini taqdim etmoqda.
Yaqinda bank tomonidan parrandachilik sohasi uchun maxsus “Parranda faktoring” moduli yoʻlga qoʻyildi. Bu modul Oʻzbekiston Respublikasi Prezidentining 2025-yil 30-yanvardagi PQ-34-sonli qarorining 2.b-bandi ijrosi doirasida ajratilgan 50 milliard soʻm mablagʻ hisobidan parrandachilikning goʻsht va tuxum yoʻnalishlarini kooperatsiya asosida rivojlantirish hamda aholi bandligini taʼminlashga qaratilgan. Mazkur modul orqali Mikrokreditbankda 6 oygacha boʻlgan muddatda, muddatiga qarab 1 foizdan 7 foizgacha diskont bilan imtiyozli moliyaviy xizmatlar taqdim etilmoqda.
Natijalarga koʻra, 2024-yil davomida tadbirkorlik subyektlariga 42,2 milliard soʻm miqdorida, joriy yilning oʻtgan davrida esa 41 milliard soʻmdan ortiq moliyaviy xizmatlar taqdim etildi.
Xulosa qilib aytish mumkinki, Mikrokreditbank tomonidan joriy qilingan faktoring xizmatlari modullari kichik va oʻrta biznes subyektlari uchun yangi moliyaviy imkoniyatlarni yaratdi. Bu esa tadbirkorlik faoliyatini qoʻllab-quvvatlash, eksport salohiyatini oshirish va aholi bandligini taʼminlash borasida muhim omil boʻlib xizmat qilmoqda.
Bank Axborot xizmati
Yana ko‘ring
Rahbar va yoshlar uchrashuvi: tibbiyot muassasasida
Korporativ bank kartalari: tezkorlik, shaffoflik va qulay boshqaruv
