“Ikki buyuk siymo: maʼnaviyatimiz sarchashmalari”

Oʻzbek xalqi tarixida oʻchmas iz qoldirgan ikki buyuk siymo – ulugʻ bobokalonlarimiz - Alisher Navoiy va Zahiriddin Muhammad Bobur – maʼnaviyat sarchashmalari sifatida abadiy qadrlanadi. Ular oʻz ijodi va faoliyati bilan millat maʼnaviyatini yuksaltirgan, adabiyot va madaniyatda yangi sahifalar ochgan buyuk allomalardir.

"Mikrokreditbank" ATB tashabbusi bilan tashkil etilgan "Buyuk siymolarni yod etib..." nomli ijodiy uchrashuv nafaqat ularning boy merosini yodga olish, balki bugungi avlodga ularning asarlari va hayot yoʻlining maʼnaviy ahamiyatini yetkazish maqsadiga qaratildi.

Tadbirda Oʻzbekiston milliy akademik drama teatri aktyori, Oʻzbekiston va Qoraqalpogʻiston xalq artisti, Xalqaro Bobur mukofoti sovrindori, OʻzDSMI professori Muhammadali Abduqunduzov ishtirok etib, buyuk siymolar haqida qiziqarli mulohazalar bildirdi.

U oʻz nutqida Zahiriddin Muhammad Boburning betakror shaxsiyati haqida toʻxtalib, "Boburnoma" filmida buyuk shoir va sarkarda obrazini yaratish sharafiga muyassar boʻlganini gʻurur bilan taʼkidladi. "Hanuzgacha odamlar meni "Bobur aka" deb chaqirishiga oʻrganib qolganman, men esa bu nomdan faxrlanaman", – dedi u samimiyat bilan.

Shuningdek, tadbirda Bobur haqidagi videofilmdan parchalar namoyish etildi. Bank xodimlari film orqali buyuk sarkardaning hayoti va faoliyatiga oid tarixiy voqealarni tomosha qilish bilan birga, suratga olish jarayoni haqidagi qiziqarli maʼlumotlarga ega bo‘ldilar.

Muhammadali Abduqunduzov tomonidan Bobur monologi oʻqildi, shoirning qalbini toʻldirgan dard va armon, yurtga boʻlgan sogʻinch hamda muhabbati badiiy ifodalandi.

Tadbirda Navoiy asarlarining jahon madaniyatida tutgan oʻrni haqida ham soʻz yuritildi. Bugun uning asarlari dunyoning yuzlab tillariga tarjima qilingani, jahon adabiyoti va maʼnaviyati rivojiga ulkan hissa qoʻshgani taʼkidlandi.

Qiziqarli fakt sifatida tadbir davomida shunday maʼlumot keltirildi:

• Aleksandr Pushkin asarlarida 21 197 ta betakror soʻz ishlatgan.

• Uilyam Shekspir – 20 000 ga yaqin.

• Migel de Servantes – 1000 ga yaqin.

• Alisher Navoiy esa 1 378 660 ta betakror soʻz ishlatgan!

Bu raqamlar Navoiy soʻz boyligining nechogʻlik ulkan ekanini, uning turkiy, forsiy, arabiy, urdu, xitoy va moʻgʻul tillarida mahorat bilan ijod qilganini yaqqol isbotlaydi.

Tadbir davomida Alisher Navoiy va Bobur qalamiga mansub gʻazal va ruboiylar oʻqilib, jonli mushoira tashkil etildi. Ishtirokchilar buyuk siymolar ijodidan ruhiy ozuqa olib, ularning asarlaridan ilhomlangan holda maʼnaviy muloqotga kirishdilar.

Navoiy va Bobur singari buyuk siymolarning ijodi va hayoti bugungi avlod uchun maʼnaviyat va bilim manbai boʻlib qoladi.

Bank Axborot xizmati