Kredit qarzdorlik to‘liq so‘ndirilgandan keyin Kredit qo‘mitasiga tavsiya etiladi

Bugun “Telegram” ijtimoiy tarmog‘idagi “Bankir kundaligi” kanalida “Sherzodbek Inter Servis” MChJ rahbarining Mikrokreditbankdan olgan krediti ta’minotini almashtirish masalasida muammoga duch kelayotgani haqidagi murojaati e’lon qilindi.  

Murojaatda, 1 mlrd 800 million so‘m kredit ta’minoti uchun qo‘yilgan Buxoro shahri, T.Farog‘iy ko‘chasida joylashgan 74-uyning 11-xonadoni va 2021-yilda ishlab chiqarilgan “Сobalt” rusumli avtotransport vositasini taqiqdan chiqarib, o‘rniga 2023-yilda ishlab chiqarilgan “Jetour” rusumli avtotransport vositasini qo‘ymoqchiligi aytilgan.  

“Sherzodbek Inter Servis” MChJga bank tomonidan ajratilgan kredit mablag‘i ta’minoti uchun taqdim etilgan garov mulklarini almashtirish bo‘yicha Buxoro viloyat mintaqaviy filiali tomonidan joriy yilning 5-oktabr sanasida bank Boshqaruviga murojaat qilingan. 

Xat joriy yilning 6-oktabr sanasidan Kreditlarni boshqarish departamentiga garov ta’minotlarini o‘rganib, Bosh ofis Kredit qo‘mitasiga kiritish maqsadida ijro va nazorat uchun o‘tkazilgan. 

Kreditlarni boshqarish departamenti xodimlari tomonidan ushbu mijozning kredit tarixi o‘rganilganda, mijoz ijobiy kredit tarixiga ega emasligi, doim kreditlarni kechikib to‘lanishi hamda ayni paytda mijozning 55 million so‘mdan ortiq kredit qarzdorligi mavjudligi aniqlandi. 

Kredit yig‘majildlarini shakllantirish va hujjatlarni rasmiylashtirish reglamentiga asosan, mijoz tomonidan muddati o‘tgan qarzdorliklar to‘liq so‘ndirilgandan so‘ng garov ta’minotlarini almashtirish masalasi Mikrokerditbank Bosh ofis Kredit qo‘mitasiga tavsiya etilib, 5 bank ish kunida mijozga rasmiy ma’lumot taqdim qilinadi.

Bank Axborot xizmati