“Mikrokreditbank” ATBda TDIU Marketing kafedrasi filiali ochildi

Oʻzbekiston Respublikasi Prezidentining 2024-yil 7-fevraldagi “Iqtisodiyot sohalari uchun kadrlar tayyorlash tizimini tubdan takomillashtirish chora-tadbirlari toʻgʻrisida”gi PQ-62-son qarorida belgilangan vazifalar ijrosini taʼminlash maqsadida, “Mikrokreditbank” ATBda Toshkent davlat iqtisodiyot universitetining Marketing kafedrasi filiali ochildi. 

Kafedra filialini ochishda “Mikrokreditbank” ATB Boshqaruv raisi oʻrinbosari Sh.Ibragimova, TDIUning oʻquv ishlari boʻyicha birinchi prorektori S.Mehmonov, universitetning Marketing kafedrasi professor-oʻqituvchilari va bank xodimlari ishtirok etdi.  

Bankda kafedra filialini ochishdan maqsad fan, taʼlim va ishlab chiqarish integrasiyasini taʼminlash orqali talabalarning amaliy koʻnikmalarini oshirish, zamonaviy bilim va yuksak maʼnaviy-axloqiy fazilatlarga ega, mustaqil fikrlaydigan yuqori malakali kadrlar tayyorlash jarayonini sifat jihatidan yangi bosqichga koʻtarish, nazariy bilim olishga yoʻnaltirilgan taʼlimdan amaliy koʻnikmalarni shakllantirishga yoʻnaltirilgan taʼlim tizimiga oʻtishni taʼminlashdan iborat.

Kafedra filialining asosiy vazifalari quyidagilardan iborat:

yuqori malakali mutaxassislar tayyorlash jarayoniga kadrlar buyurtmachilarini faol jalb etish;
oʻquv jarayonini amaliy koʻnikmalarni shakllantirishga yoʻnaltirish, dars mashgʻulotlarini olib borishga amaliyot obyektining tajribali va yetakchi mutaxassislarini jalb etish;
amaliyot obyektining yirik amaliyotchi mutaxassislari ishtirokida davra suhbatlari va master klass, ilmiy konferensiyalar tashkil etish;
amaliyotchi mutaxassislar bilan hamkorlikda amaliyot obyekti boʻyicha ilmiy tadqiqot ishlarini amalga oshirish;
amaliyot obyekti tomonidan turli tanlovlar oʻtkazish orqali iqtidorli va bilim olishga intilgan talabalarni moliyaviy hamda maʼnaviy qoʻllab-quvvatlash.

Tadbir so‘ngida belgilangan vazifalar ijrosini taʼminlash boʻyicha yoʻl xaritasi tuzishga kelishib olindi.

Bank Axborot xizmati