Mikrokreditbank rahbariyati Xiva shahrida hunarmandlar bilan uchrashuv o‘tkazdi

Bugun Boshqaruv raisi Orif Butayev ishtirokida bankning moliyaviy ko'magida Xorazm viloyati Xiva shahrida yangidan qurilayotgan Hunarmandlar markazi loyihasi doirasida mahalliy hunarmandlar bilan ochiq muloqot o‘tkazildi. Unda ishtirokchilarga mazkur loyiha doirasida amalga oshirilayotgan ishlar, sohani rivojlantirish, mavjud imkoniyatlardan samarali foydalanish hamda moliyaviy ko‘mak masalalari yuzasidan ma’lumotlar berildi.

Ma’lumki, Oʻzbekiston Respublikasi Prezidentining 2024-yil 27-noyabrdagi “Xorazm viloyatini kompleks ijtimoiy-iqtisodiy rivojlantirishni jadallashtirish boʻyicha qoʻshimcha chora-tadbirlar toʻgʻrisida”gi qaroriga asosan Mikrokreditbank tomonidan Xiva shahridagi “Toʻrt shovvoz” madaniy meros obyektiga tutash hududdan tanlangan 6,2 gektar yer uchastkasida Hunarmandlar markazini barpo etish belgilangan.

Mazkur markazda hunarmand va zargarlar oʻz mahsulotlarini ustaxonalarida tayyorlashi hamda ushbu jarayonlarni mahalliy va xorijiy sayyohlarga namoyish qilishi, shuningdek, mahsulotlar sotuvini yo‘lga qo‘yishi uchun qulay imkoniyat yaratiladi.

E'tiborlisi, ushbu loyiha doirasida Xiva shahrida 1000 dan ortiq yangi ish o‘rni yaratilishi va hunarmandlar tomonidan har yili 1000nafardan shogird tayyorlash rejalashtirildi.

Tadbir yakunida Hunarmandlar markazi loyihasi doirasida ishtirokchilar tomonidan bildirilgan takliflar yuzasidan aniq chora-tadbirlar belgilab olindi.

Bank Axborot xizmati