MKBANK: Ayollar tadbirkorligini qoʻllab-quvvatlash gender tenglikka ishonch beradi

Mikrokreditbank” ATBda “Xotin-qizlar tadbirkorligi va gender tenglik: davlat va jamiyat hayotida ayollar rolini oshirish” mavzusida oʻquv seminari tashkil etildi. Unda Oliy Majlis Senatining Xotin-qizlar va gender tenglik masalalari qoʻmitasi raisi Malika Qodirxonova, Oʻzbekiston Respublikasi Markaziy banki Moliyaviy ommaboplik boʻyicha bosh direktori Dilbar Abduganiyeva, “Mikrokreditbank” ATB Boshqaruv raisi oʻrinbosari Shaxlo Ibragimova, bankning tegishli departamentlari, hududiy boshqarmalarning xotin-qizlar tadbirkorligi boʻyicha masʼul xodimlari va bank mijozi boʻlgan tadbirkor xotin-qizlar ishtirok etdi.

Seminarda spikerlar tomonidan Oʻzbekistonda xotin-qizlar tadbirkorligini rivojlantirish uchun erishilayotgan natijalar, Xalqaro maydonda Oʻzbekiston tajribasining eʼtirof etilayotgani, bugun oʻzbek ayollarining davlat va jamiyatdagi oʻrni tobora mustahkamlanib borayotgani haqidagi asoslangan maʼlumotlar taqdim etildi. Shuningdek, gender siyosati endilikda islohotlar bosqichidan tizimli siyosat darajasiga koʻtarilayotgani taʼkidlandi va bu yo‘lda moliyaviy ommaboplik hamda savodxonlikning muhiligi tushuntirildi.

O‘quv-seminar davomida Oʻzbekiston Respublikasi Prezidentining 2025-yil 14-martdagi  “Oila va xotin-qizlarni qoʻllab-quvvatlash tizimini yanada takomillashtirish chora-tadbirlari toʻgʻrisida”gi PQ-103-sonli qarori doirasida ishlab chiqilgan “Ayollar tadbirkorligini qoʻllab-quvvatlash yoʻnalishida moliyaviy xizmatlar koʻrsatish strategiyasi”ning mazmun-mohiyati ham ishtirokchilarga tanishtirildi.

Ushbu strategiya ayollar tadbirkorligini rivojlantirishda tijorat banklarining ishtiroki va faolligini kuchaytirish, ayollar orasida kichik va oʻrta biznesni qoʻllab-quvvatlash uchun eng qulay shart-sharoitlarni yaratishi, moliyaviy sohada inklyuzivlikni yaxshilash, shuningdek, sektorda mahsulotlarning xilma-xilligini har tomonlama rivojlantirish kabi qator ustuvor vazifalarni qamrab oladi.
Shuningdek, uchrashuv davomida yana qator mavzularda muloqotlar olib borildi, tadbirkorlar oʻz faoliyatidan kelib chiqib, taklif va tashabbuslari bilan oʻrtoqlashdi.

Tadbirkorlik uchun, avvalo, tavakkalchilik, mablagʻ, bilim va koʻnikmadan ham muhim boʻlgan yoʻnalish bor. Bu – marketing, raqamli savodxonlik va mentorlik.  Shu kabi muhim maʼlumotlar esa ishtirok etayotgan tadbirkor opa-singillarimiz uchun yangi bilimlar manbai boʻla oldi. 

Qiziqarli, samimiy, ochiq va erkin muloqot muhiti yaratildi. “Mikrokreditbank” ATBda oʻtkazilgan mazkur seminar xotin-qizlar tadbirkorligini qoʻllab-quvvatlash va gender tenglikni taʼminlash yoʻlida amaliy qadam boʻldi.