Joriy yilning 27–28-may kunlari Qashqadaryo viloyati, Shahrisabz tumanidagi Miraki madaniyat-sayyohlik markazida “Iqtisodiy rivojlanish va raqobatbardoshlikni oshirishda kichik va oʻrta biznes imkoniyatlarini kengaytirish” mavzusida xalqaro konferensiya boʻlib oʻtdi.
Tadbirda Oʻzbekiston Respublikasi iqtisodiyot va moliya vazirligi, kichik va oʻrta biznes subyektlari, moliyaviy institutlar, xalqaro tashkilotlar, rivojlanish boʻyicha hamkorlar Osiyo taraqqiyot banki, Yevropa tiklanish va taraqqiyot banki, Jahon banki Birlashgan Millatlar Tashkilotining Taraqqiyot Dasturi va qator ilmiy muassasalar, tadqiqot markazlari hamda ommaviy axborot vositalari vakillari ishtirok etdi.
Konferensiyaning asosiy maqsadi — Oʻzbekistonning 2025–2030-yillarda kichik va oʻrta biznesni rivojlantirish strategiyasini rasman taqdim etish, manfaatdor tomonlarni ushbu strategiyani amalga oshirishga faol jalb qilish hamda hamkorlikni kuchaytirishdan iborat boʻldi.
Mazkur anjuman mikro, kichik va oʻrta biznes sektorini rivojlantirish orqali barqaror iqtisodiy oʻsishga erishishni koʻzlagan keng qamrovli tashabbus sifatida eʼtirof etildi.
Ahamiyatlisi, konferensiyada “Mikrokreditbank” ATB Boshqaruv raisi oʻrinbosari Shahlo Ibragimova ham ishtirok etdi.
Shahlo Ibragimova oʻz nutqida “Mikrokreditbank” ATB tomonidan kichik biznesni moliyaviy qoʻllab-quvvatlash, oilaviy tadbirkorlikni rivojlantirish hamda ayollarni tadbirkorlikka faol jalb qilish borasida erishilgan natijalar haqida maʼlumot berdi. Shuningdek, bankning innovatsion kredit mahsulotlari, konsalting xizmatlari va taʼlim dasturlari orqali mahalliy tadbirkorlarni qoʻllab-quvvatlashda faol ishtirok etayotganini taʼkidlab o‘tdilar.
Anjumanda Oʻzbekiston Respublikasi Iqtisodiyot va moliya vazirligi, xalqaro moliyaviy institutlar va rivojlanish agentliklari bilan hamkorlikda ishlab chiqilgan strategiyaning maqsadlari, ustuvor yoʻnalishlari va amalga oshirish mexanizmlari muhokama qilindi. Ayniqsa, bilim almashish, ilgʻor amaliyotlarni joriy etish, kichik va oʻrta biznesni moliyaviy qoʻllab-quvvatlash, ayollar va yoshlar tadbirkorligini kengaytirish masalalari asosiy eʼtiborda boʻldi.
Xalqaro anjuman yakunida strategiyani amalga oshirishda ishtirokchilarning roli, hamkorlik mexanizmlari hamda muhim tashabbuslarni amalga oshirish boʻyicha kelgusi rejalar belgilab olindi.
Bank Axborot xizmati
Yana ko‘ring
MKBANKning "Bank of China"da to‘g‘ridan-to‘g‘ri korrespondentlik hisobvarag‘i ochildi
MKBANKda raqamlashtirish bo‘yicha yana bir muhim yangilik!
