O‘zbekiston Respublikasi Vazirlar Mahkamasining 2025-yil 31-maydagi “2025-yil hosilidan bug‘doy xarid qilish va ichki bozorni don bilan barqaror ta’minlash chora-tadbirlari to‘g‘risida”gi 345-sonli qarorida Iqtisodiyot va moliya vazirligi huzuridagi Qishloq xo‘jaligini davlat tomonidan qo‘llab-quvvatlash jamg‘armasi tomonidan urug‘lik bug‘doyni xarid qilish, tayyorlash va sug‘urtalash xarajatlarini kreditlash uchun 12 oy muddatga (shundan, 6 oy imtiyozli davr bilan), Markaziy bank asosiy stavkasining 50 foizi miqdoridan 4 foiz bandga past stavkada kredit resurslarini urug‘lik bug‘doy tayyorlash korxonalariga xizmat ko‘rsatuvchi tijorat banklariga joylashtirilishi ma’lum qilingan.
Mazkur qaror ijrosini ta’minlash maqsadida, tijorat banklariga ushbu kredit resurslari hisobidan urug‘lik bug‘doy tayyorlash korxonalariga sug‘urta polisi asosida Markaziy bank asosiy stavkasining 50 foizi miqdorida 12 oy muddatga (shundan, 6 oy imtiyozli davr bilan) kredit ajratishi belgilangan.
Yuqoridagilarni inobatga olgan holda “Mikrokreditbank” ATB tomonidan qishloq xo‘jaligi korxonalariga (fermer xo‘jaliklariga) sifatli urug‘ yetkazib berish maqsadida urug‘lik bug‘doyini xarid qilish hamda tayyorlashda talab etiladigan aylanma mablag‘lar uchun “Barakali bug‘doy” krediti ishlab chiqildi.
Mazkur kredit milliy valyutada tadbirkorlik subyekti hisoblangan yuridik shaxslar uchun taqdim etiladi. Bunda mijozdan Fyuchers va kontraktatsiya shartnomasi, ariza, biznes-reja yoki pul oqimlari prognozi, tovar va mahsulotlar (xizmatlar) bo‘yicha tuzilgan oldi-sotdi shartnomasi nusxasi va boshqa qo‘shimcha hujjatlar talab etilishi mumkin.
Shuningdek, bank tomonidan hududlarda oziq-ovqat xavfsizligini ta’minlash hamda asosiy iste’mol mahsulotlari tannarxining oshib ketishining oldini olish maqsadida oziq-ovqat mahsulotlarini g‘amlash hamda saqlash va qayta ishlashda talab etiladigan aylanma mablag‘larni to‘ldirish uchun “Agro zaxira” kredit mahsuloti ham ishlab chiqildi.
“Agro zaxira” krediti kichik va o‘rta tadbirkorlik subyektlari, ya’ni qishloq xo‘jaligi hamda oziq-ovqat mahsulotlarini saqlash bo‘yicha maxsus ombor, sovutish omborlariga ega bo‘lgan mijozlarga yoki ushbu faoliyatni amalga oshirish va bino-inshootidan foydalanish huquqni beruvchi ijara shartnomalari rasmiylashtirgan yuridik shaxslar uchun 6 oygacha, 4 oygacha asosiy qarz to‘lovi bo‘yicha imtiyozli muddat bilan taqdim etiladi.
Kreditning yuqori miqdori 5 mlrd.so‘m bo‘lib, yillik 30 foizni tashkil etadi.
Bank Axborot xizmati
Yana ko‘ring
Bayram kunlaridagi ish tartibi!
