O‘zbekiston Respublikasi Prezidentining 2025-yil 20-oktabrdagi “Davlat tilini yanada rivojlantirishga oid qo‘shimcha chora-tadbirlar to‘g‘risida”gi qarori ijrosini ta’minlash maqsadida “Mikrokreditbank” ATBda “Ommaviy diktant” aksiyasi tashkil etildi.
Ushbu tashabbusning asosiy maqsadi — bank xodimlarining lotin yozuviga asoslangan o‘zbek alifbosida ish yuritish ko‘nikmalarini mustahkamlash, savodxonlik darajasini baholash hamda davlat tiliga bo‘lgan e’tibor va hurmatni yanada oshirishdan iborat.
Diktant mavzusi uchun o‘zbek adabiyotining eng sevimli asarlaridan biri — O‘tkir Hoshimovning “Dunyoning ishlari” kitobidagi “Tush” hikoyasi tanlandi. Matnni Bank Boshqaruv raisining ma’naviy-ma’rifiy ishlar va davlat tili masalalari bo‘yicha maslahatchisi, jurnalist Gulshoda Ibrohimova o‘qib berdi.
Tadbir davomida ishtirokchilar o‘zbek tilining imlo qoidalari, tinish belgilari va to‘g‘ri yozuv madaniyati bo‘yicha bilim va ko‘nikmalarini amalda sinab ko‘rish imkoniga ega bo‘ldilar.
Bank jamoasi uchun ushbu aksiya nafaqat savodxonlikni baholash, balki ma’naviyatni oshirish va kitobxonlik madaniyatini targ‘ib etishga ham xizmat qildi.
Aksiya yakunida ayrim xodimlar O‘tkir Hoshimov ijodi bilan yanada yaqindan tanishish istagini bildirdi. Ba’zilari esa bu asarni ilgari o‘qimaganini yashirmadi va bugunoq uni mutolaa qilish niyatida ekanligini aytdi.
Bank jamoasi diktant yozish jarayonini - yoshlik va maktab davrlarini eslatuvchi nostalgiya deb atadi. Ayrimlar esa bu jarayonni xotira, shaxsiy rivojlanish va ijodiy tajriba sifatida baholadi.
Bank Axborot xizmati
Yana ko‘ring
MKBANKning "Bank of China"da to‘g‘ridan-to‘g‘ri korrespondentlik hisobvarag‘i ochildi
Xalqaro pul o‘tkazmalari – MKBANK bilan tez, qulay va ishonchli yechim
